Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 125 Hüküm no: 85 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Dahkî Mustafa Efendi’nin vasiyeti üzere azatlı kölesi Şaban’a terekeden 100 kuruş verilmesi Mahmiye-i İstanbul’da Şeyh İbn Vefâ Meydânı kurbünde Mollagürânî Mahallesi’nde sâkin iken bundan akdem vedâ‘-ı âlem-i fânî eden merhûm Dahkî Mustafa Efendi b. Mirza’nın zâhirde vâris-i ma‘rûfu olmamak ile terekesi taraf-ı beytü’l-mâle âid olduğu şer‘an mütehakkık oldukdan sonra müteveffâ-yı mezbûrun abd-i memlûkü olup rıkk-ı sâbıkını mu‘terif <> ve hâlâ medîne-i Tire’de olan orta boylu açık kaşlı elâ gözlü sarı bıyıklı Rusiyyü’l-asl işbu bâ‘isü’l-kitâb Şa‘ban b. Abdullah tarafından husûs-ı âti’l-beyâna vekîl olduğu nehc-i şer‘î ve tarîk-ı mer‘î üzre sâbit olan müteveffâ-yı mezbûrun hazînedârı Ramazan Bey b. Abdurrahman nâm kimesne Dîvân-ı Hümâyûn-ı sa‘âdet-makrûnda ma‘kūd meclis-i şer‘-i şerîfde tereke-i müteveffâ-yı mezbûra bi’l-emâne vâzı‘u’l-yed olan câmi‘ü’l-emvâli’s-Sultâniye hâfızü’l-hazâini’l-Osmâniye hâlâ şıkk-ı evvel defterdârı olan Hasan Efendi mahzarında bi’l-vekâle üzerine da‘vâ ve takrîr-i kelâm edip efendim müteveffâ-yı mezbûr Dahkî Mustafa Efendi hayatında müvekkilim mevsûf-ı mezbûr Şa‘ban’ı mâlından tahrîr ve i‘tâk eylediğinden mâ‘adâ bi-emrillâhi te‘âlâ kazâ-i nahb eylediğinde mâlından yüz esedî guruş verile deyü vasiyet ve musırrân alâ-îsâihî vefât etmekle hâlâ mûmâ-ileyh Hasan Efendi’den meblağ-ı mezbûr yüz esedî guruşu müteveffâ-yı mezbûrun vasiyeti üzre taleb eylediğimde bana def‘ ü teslîmden imtinâ‘ eder suâl olunup meblağ-ı mezbûr yüz esedî guruşu müteveffâ-yı mezbûrun tereke-i vâfiyesinden bana def‘ ü teslîme mûmâ-ileyh Hasan Efendi’ye tenbîh olunmak matlûbumdur dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından Mustafa b. Mehmed ve Mehmed Çavuş b. Mehmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Dahkî Mustafa Efendi hayatında bizim huzûrumuzda mevsûf-ı mezbûr Şa‘ban’ı mâlından tahrîr ve i‘tâk eylediğinden mâ‘adâ bi-emrillâhi te‘âlâ kazâ-i nahb eylediğimde mâlımdan dahi yüz esedî guruş verile deyü vasiyet ve musırrân alâ-îsâihî vefât eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olup mûcebince mevsûf-ı mezbûr Şa‘ban’ın ıtkına ba‘de’l-hükm meblağ-ı mezbûr yüz esedî guruşu tereke-i müteveffâ-yı mezbûrdan vekîl-i mezbûra def‘ ve teslîme mûmâ-ileyh Hasan Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene tis‘în ve elf. Şuhûdü’l-hâl: Umdetü erbâbü’t-tahrîr ve’l-kalem Ali Efendi Tezkire-i ûlâ, zübdetü ashâbi’t-tastîr ve’r-rakām Mustafa Efendi Tezkire-i sâniye, Mehmed Ağa Kethudâ-yı Hazret-i Efendi, el-Hâc Mustafa Çukadâr-ı Hazret-i Efendi.