Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 127 Hüküm no: 87 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ahmed’in evine el koyduğu iddiasıyla Mehmed b. Naim’e açtığı davanın reddedildiği Mahrûse-i Galata’ya tâbi‘ kasaba-i Fındıklı sâkinelerinden Fâtıma bt. Ahmed nâm hatun meclis-i şer‘-i hatîrde mahmiye-i İstanbul’da vâki‘ Receb Ağa ve Âişe Hatun vakfının bi’l-fi‘il mütevellîsi olan Ahmed Çelebi’nin kāimmakāmı İbrahim Efendi muvâcehesinde zikri âtî menzile vâzı‘u’l-yed olan işbu bâ‘isü’l-kitâb el-Hâc Mehmed b. Naim mahzarında üzerine da‘vâ ve takrîr-i kelâm edip vakf-ı mezbûra beher mâh kırk beş akçe icâre-i müeccelesi olup mahmiye-i mezbûrede Yavaşça Şahin Mahallesi’nde vâki‘ bir tarafdan arsa-i hâliye ve bir tarafdan tarîk-ı hâs ve iki tarafdan tarîk-ı âm ile mahdûd fevkānî ve tahtânî iki bâb oda ve bir sofa ve matbah ve kenîfi müştemil menzilin nısfı benim ve nısf-ı âharı zevcim Mehmed b. Ahmed’in tasarrufunda olmağla zevcim Mehmed Bey yetmiş altı senesi Recebi’l-müreccebi’nde benim iznim yoğiken menzil-i mahdûd-ı mezbûru yüz kırk guruş bedel-i medfû‘ mukābelesinde mezbûr el-Hâc Mehmed’e fuzûlen ferâğ ve tefvîz ol dahi tefevvüz ve kabûl etmeğin hâlâ menzil-i mezbûra bi-gayr-ı hakkın vaz‘-ı yed eder suâl olunup <> menzil-i mezbûrun nısfından kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûr el-Hâc Mehmed cevâbında ber-vech-i muharrer müdde‘iyye-i mezbûrenin zevci mezbûr Mehmed menzil-i mezbûru bana tefvîz eylediğinden sonra müdde‘iyye-i mezbûre Fâtıma tefvîz-i mezbûru tecvîz edip hatta bi-nefsihâ vakf-ı mezbûr mütevellîsi olup bundan akdem vefât eden Receb Ağa huzûrunda kendi hissesini bana ferâgat eyledikde mütevellî-i mezbûr dahi müdde‘iyye-i mezbûre ile zevci mezbûr Mehmed’in ikrâr ve takrîrlerini tahrîr ve yedime hat ve hatmini hâvî işbu ferâgat temessükünü vermişidi deyücek isre’l-istintâk ve’l-inkâr merkūm el-Hâc Mehmed’den takrîr-i meşrûhuna mutâbıka beyyine taleb olundukda udûl-i Müslimînden olup Yarhisar Mahallesi’nden İsmail Efendi b. Yusuf ve Hüseyin Efendi b. Hasan nâm kimesneler li-ecli’ş-şehâde meclis-i şer‘a hâzırân olup isre’l-iştişhâd fi’l-hakīka müdde‘iyye-i mezbûrenin zevci mezbûr Mehmed menzil-i mezbûru el-Hâc Mehmed’e [ber-vech-i] muharrer tefvîz eylediğinden sonra müdde‘iyye-i mezbûre Fâtıma tefvîz-i mezbûru bizim huzûrumuzda tecvîz edip hatta mütevellî-i mezbûr huzûrunda bi-nefsihâ kendi hissesini mezbûr el-Hâc Mehmed’e ferâgat eylediğinde mütevellî-i mezbûr dahi mezbûrân Fâtıma ve Mehmed’in ber-vech-i meşrûh ikrâr ve takrîrlerini tahrîr ve yedine hat ve hatmini hâvî işbu ferâgat temessükünü vermişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iyye-i mezbûre Fâtıma bî-vech ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: el-Hâc Mustafa b. Mehmed, el-Hâc Hızır b. Hamza, el-Hâc Mustafa b. Receb, Mustafa b. Abdullah, Şa‘ban b. Mustafa, Ömer b. Mehmed, Musa b. Ali, Mehmed Çelebi b. Haydar