Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 126 Hüküm no: 86 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Hüseyin adlı eşkıyanın ıslah oluncaya değin hapsedildiği Mihaliç kazâsına tâbi‘ Nefs-i İlbad kasabası ahâlîsinden el-Hâc Abdülkadir b. Cafer ve Dilaver b. Abdullah ve Ömer b. Mustafa ve Ali b. Ali ve Mehmed b. Yusuf ve Ali b. Veli ve Ömer b. Mehmed nâm kimesneler yine kasaba-i mezbûre ahâlîsinden Hüseyin b. Hüseyin nâm şakīyi meclis-i şer‘-i şerîfe ihzâr ve muvâcehesinde her biri takrîr-i da‘vâ edip mezbûr Hüseyin târih-i kitâbdan on iki gün mukaddem kasaba-i mezbûre ahâlîsinden İvaz nâm kimesneyi varsak ta‘bîr olunur bıçak ile başından üç yerde urup mecrûh edip ve beş ay mukaddem işbu hâzıra bi’l-meclis Hamadin bt. Peykli nâm Nasrâniye’ye dahi fi‘l-i şenî‘ kasdıyla gece ile menziline girip beş pâre bezini ve bir sîm kuşağını ve küpelerini ahz edip ve kezâlik dokuz ay mukaddem Dilaver nâm kimesnenin oğluna dahi fi‘l-i şenî‘ kasdıyla menzilin basıp bir eyerin ahz edip ve bunun emsâli kasaba-i mezbûrede nice akvâl ve ef‘âli zuhûr edip ve zikrolunan husûslar için yedimizde iki kıt‘a hüccet-i şer‘iyemiz dahi olup ve’l-hâsıl mezbûr Hüseyin şakī ve sâ‘î bi’l-fesâd olup iyi âdem olmamağla dâimâ bu makūle ef‘âlinden müteezzîleriz deyü her biri mezbûr Hüseyin muvâcehesinde alâ-tarîkı’ş-şehâde haber vermeleriyle mûcebince mezbûr Hüseyin’in salâh-ı hâli zâhir oluncaya değin habs-i medîd ile habsolunmak üzre hüküm birle mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Eyüb Beşe b. Osman, Hüseyin Efendi el-kâtib, Mehmed Çelebi b. Haydar, Ahmed Çelebi b. Piyale, İslam Bey el-Muhzır.