Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 149 Hüküm no: 109 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühan bt. Yusuf ile kocası Mehmed b. Abdullah’ın birbirlerinin zimmetini ibra ettikleri Mahmiye-i İstanbul’da Osman Paşa odalarında sâkine olup zâtı Osman Beşe b. Abdullah ve Eyüb Çelebi b. Ömer nâm kimesneler takrîrleriyle mu‘arrefe olan Ümmühan bt. Yusuf nâm hatun meclis-i şer‘-i şerîf-i lâzımü’t-teşrîfde zevc-i dâhili el-Hâc Mehmed b. Abdullah nâm kimesne mahzarında ikrâr ve takrîr-i kelâm edip bundan akdem işbu hazır bi’l-meclis Abdurrahman b. Arslan nâm kimesnenin ben zevcesi olup bin doksan senesi Zilka‘desi’nin sekizinci günü Mahmudpaşa mahkemesinde nâibü’ş-şer‘ olan Abdülhalim Efendi huzûrunda iki bin akçe mehr-i müeccelim ve nafaka-i iddet-i mu‘ayyenem üzerlerine ve meûnet-i süknâm dahi kendi üzerine [üzerime] olmak üzre mezbûr Abdurrahman ile hul‘ olup ol dahi hul‘-ı mezbûru kabûl edip yedine hüccet-i şer‘iye aldıkdan sonra iddet munkaziye olmazdan on iki gün mukaddem mezbûr el-Hâc Mehmed üç bin akçe mehr-i müeccel üzerine nefsini tezvîc ol dahi tezevvüc [ve] kabûl etmekle hâlâ tezevvüc-i merkūm fâsid olmağın mehr-i misil lâzım gelmekle zikrolunan mehr-i misil ve gayra müte‘allika de‘âvî ve mutâlebâtdan ben mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt ol dahi beynimizde cârî olan ahz ü i‘tâya müte‘allika âmme-i de‘âvîden (...) benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharrem li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, el-Hâc Mustafa Çukadâr, fahrü’l-kuzât Ni‘metullah Efendi b. Mehmed, Ahmed Çelebi b. Piyale.