Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 151 Hüküm no: 111 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fi bt. Abdullah adlı hatunun vefat eden Mehmed Beşe b. İsmail’in cariyesi iken onun tarafından azat edildiğini ispatladığı Husûs-ı âti’l-beyânın mahâllinde istimâ‘ ve tahrîri için ba‘s olunan Mevlânâ es-Seyyid el-Hâc Mehmed Efendi b. es-Seyyid Mehmed Efendi irsâl olunup ol dahi mahmiye-i İstanbul’da Süleymâniye Câmi‘-i Şerîfi kurbünde Ağa Kapısı dâhilinde vâki‘ Dergâh-ı âlî -dâme mahfûfen bi’l-meâli- yeniçerilerinin beytü’l-mâlcisine mahsûs odaya varıp zeyl-i sahîfede muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde işbu kara kaşlı gök elâ gözlü orta boylu Rusiyyetü’l-asl Fi bt. Abdullah nâm hatun meclis-i ma‘kūd-ı mezbûrda yine mahmiye-i mezbûrda Gedikpaşa’da Dîvâne Ali Mahallesi’nde sâkin iken bundan akdem vefât eden Mehmed Beşe b. İsmail nâm kimesnenin zâhirde zevce-i menkûha-i metrûkesi Marziye bt. İsmail nâm hatundan gayrı vâris-i ma‘rûfu olmayıp terekesinin rub‘u mezbûre Marziye Hatun’a ve sülüs-i erbâ‘ı cânib-i beytü’l-mâle âid olduğu şer‘an zâhir ve mütebeyyin oldukdan sonra mezbûre Marziye Hatun’un tarafından vekîl-i müsecceli olan Ârif Mehmed Efendi b. Ahmed Efendi ile tâife-i mezbûrenin bi’l-fi‘il beytü’l-mâl emîni olan Ali Ağa’dan [b.] Sefer Paşa mahzarlarında üzerlerine da‘vâ ve takrîr-i kelâm edip müteveffâ-yı mezbûr Mehmed Beşe’nin ben câriye-i memlûkesi olup târih-i kitâbdan bir sene mukaddem beni cemî‘ mâlından âzad eylemiş iken rub‘uma vekîl-i mezbûr ve sülüs-i erbâ‘ıma emîn-i mezbûr bi-gayr-ı hakkın vaz‘-ı yed ederler suâl olunup kasr-ı yedlerine tenbîh olunmak matlûbumdur dedikde gıbbe’s-suâl vekîl-i mezbûr ile emîn-i mezbûr ber-vech-i muharrer mezbûre Fi’ye vaz‘-ı yedlerini ikrâr lâkin müdde‘î-i mezbûrenin müdde‘âsını inkâr edicek müdde‘iyye-i mezbûreden müdde‘âsını [mübeyyine] beyyine taleb olundukda udûl-i Müslimînden olup Akarçeşme Mahallesi’nde sâkin Mehmed Çelebi b. el-Hâc İshak ve Demirkapı kurbünde Zülfü Ağa b. Ahmed ve Mustafa Ağa b. Abdullah ve Ebûbekir b. Abdullah nâm kimesneler li-ecli’ş-şehâde meclis-i ma‘kūd-ı mezbûra hâzırûn olup istişhâd olunduklarında fi’l-hakīka müteveffâ-yı mezbûr Mehmed Beşe târih-i kitâbdan bir sene mukaddem mevsûfe-i mezbûre Fi’yi bizim huzûrumuzda cemî‘ mâlından âzad eyledi biz bu husûsa bu vech üzre şâhidleriz şehâdet dahi ederiz deyü edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın husûs-ı mezbûra [mezbûru] mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: Ahmed Çelebi b. Mehmed, Hasan Beşe b. ( ), el-Hâc Ahmed b. Mehmed, Mustafa Çelebi b. Ahmed.