Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 152 Hüküm no: 112 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yagob v. Hürmüz’ün vârislerinin Mardiros v. Serkiz’e açtıkları ev davasının reddedildiği Mahmiye-i İstanbul’da Kefeli Mahallesi’nde mütemekkin iken bundan akdem hâlik olan Yagob v. Hürmüz nâm zimmînin verâseti zevce-i metrûkesi Turfanda bt. ( ) nâm Nasrâniye’ye ve li-ebeveyn kız karındaşı Enrime ve sulbiye kebîre kızı Şahzoda’ya münhasıra olduğu şer‘an sâbit oldukdan sonra mezbûretân Turfanda ve Şahzoda meclis-i şer‘-i şerîfde menzil-i âti’l-beyâna vâzı‘u’l-yed olan işbu bâ‘isü’s-sifr Mardiros v. Serkiz nâm zimmî muvâcehesinde her biri üzerine da‘vâ ve takrîr-i kelâm edip mahalle-i mezbûrede vâki‘ bir tarafından [30a] Bayram Çavuş menzili ve bir tarafından Yagob nâm zimmî menzili ve bir tarafdan diğer Yagob nâm zimmî menzili ve bir tarafdan tarîk-ı âm ile mahdûd bir bâb tahtânî oda ve fevkinde bir tahta-pûş ve bir mikdâr arsayı müştemil menzili mûrisimiz hâlik-i mezbûr Yagob hayatında kendi için iştirâ edivermek üzre mezbûr Mardiros’u tarafından vekîl edip mâlından yüz elli esedî guruş verdiğinden sonra mezbûr Mardiros dahi menzil-i mezbûru meblağ-ı mezbûr ile mûrisim[iz] hâlik-i mezbûr için iştirâ ve tesellüm etmek ile hâlâ suâl olunup menzil-i mezbûrdan kasr-ı yedine ve bize teslîme tenbîh olunmak matlûbumuzdur dediklerinde gıbbe’s-suâl ve akībe’l-inkâr müdde‘iyyetân-ı mezbûretândan müdde‘âlarını mübeyyine beyyine taleb olundukda ityân-ı beyyine için istimhâl edip mehl-i şer‘î ile imhâl olunup her biri ityân-ı beyyineden âciz olup mezbûr Mardiros’a yemîn dahi vermemeleriyle müdde‘iyyetân-ı mezbûretân bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene tis‘în ve elf. Şuhûdü’l-hâl: el-Hâc Mustafa Çukadâr, Receb Çelebi b. Ali, Mehmed Çelebi b. Haydar, Ahmed Çelebi b. Piyale.