Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 163 Hüküm no: 124 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Ali’nin Saniye Hatun bt. Mehmed’e olan borcunu taksitle ödeyeceği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Osman Efendi b. Mehmed irsâl olunup ol dahi mahmiye-i İstanbul’da Koğacı Dede Mahallesi’nde sâkin fahrü’l-a‘yân Abdülbaki Ağa b. Mustafa nâm kimesnenin menziline varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i mübîn eyledikde mahmiye-i mezbûre mahallâtından Beyceğiz Mahallesi ahâlîsinden fahrü’l-akrân İsmail Ağa b. Ali nâm kimesne meclis-i ma‘kūd-ı mezbûrda mahmiye-i mezbûrede Karabaş Mahallesi sâkinelerinden olup zâtı mezbûr Abdülbaki Ağa ile İbrahim Çelebi b. Abdullah nâm kimesneler ta‘rîfleriyle mu‘arrefe olan bâ‘isetü hâze’l-kitâb Sâniye Hatun bt. Mehmed tarafından husûs-ı âtîye vekîl-i müsecceli olan Şeyhzâde Mehmed Efendi b. Abdullah mahzarında ikrâr ve takrîr-i kelâm edip müvekkile-i mezbûre Sâniye Hatun’a zimmetimde cihet-i deyn-i şer‘îden dokuz yüz elli esedî guruş edâsı lâzım deynim olup bundan akdem meblağ-ı mezbûru yedinde olan hüccet-i şer‘iye nâtık olduğu üzre beher sene ikişer yüz esedî guruşa taksît etmeğin ben-dahi kabûl eyledim dedikde gıbbe’t-tasdîkı’ş-şer‘î işbu hazır bi’l-meclis zikrolunan Beyceğiz Mahallesi sâkinelerinden olup zâtı Abdülbaki Ağa b. Mustafa ile Kefeli Mahallesi sâkinelerinden Emine bt. Abdullah ve zikrolunan Karabaş Mahallesi sâkinelerinden Behzad bt. Abdullah ta‘rîfleriyle mu‘arrefe olan vâlidesi Ümmühan bt. Ömer nâm hatun meblağ-ı mukāssat-ı mezbûr dokuz yüz elli esedî guruşa tarafından emri ve kabûlü hâviye kefâlet-i sahîha-i şer‘iye ile kefîl oldum dedikde husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Çukadâr el-Hâc Mustafa b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb ve imlâ olundu. Fi’l-yevmi’s-sâmin aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: Ali Efendi b. Mehmed el-imâm, Mehmed Çelebi b. Şa‘ban, Receb Halîfe b. Ramazan, Abdi Çelebi b. el-Hâc İbrahim, Abdülkadir Çelebi b. Abdullah.