Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 164 Hüküm no: 126 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Bey b. Mustafa’nın Hatice bt. Osman’ı vefatına kadar infak ve iksa etmek üzere taahhütte bulunduğu Mahmiye-i İstanbul hısnı ebvâbından Edirnekapısı dâhilinde Salmatomruk kurbünde sâkine Hatice bt. Osman nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ömer Bey b. Mustafa nâm kimesne mahzarında ikrâr ve takrîr-i kelâm edip mezbûr Ömer Bey hâlâ kendi mâlından teberru‘an beni infâk etmekle ben-dahi eşyâ-i ma‘lûmemden üç tencere ve bir leğen ve bir ibrik ve bir tâbe ve bir kahve ibriği ve iki sahan ve üç minder ve bir orta keçesi ve bir kırmızı velençe ve bir döşek ve bir yan keçesi ve üç yasdık ve bir yo[r]gan ve bir serpûş ve bir kaftanımı ve sâir eşyâ-i ma‘lûmemi mezbûr Ömer Bey’e hîbe-i sahîha-i şer‘iye ile hîbe ve teslîm ol dahi meclis-i hîbede ittihâb ve tesellüm ve kabûl etdikden sonra mezbûr Ömer Bey dahi ba‘de’l-yevm ben vefât edinceye değin kezâlik teberru‘an kendi mâlından infâk [ve] iksâ etmek üzre ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Muharremi’l-harâm li-sene ihdâ ve tis‘în ve elf. Şuhûdü’l-hâl: Halil Bey b. İbrahim, Mehmed Çelebi b. Cafer, Mehmed Çelebi b. Haydar, Ahmed Çelebi b. Piyale.