Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 165 Hüküm no: 127 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Yorgi’nin evini borcuna takas olarak Dimitri ve Apastol kardeşlere sattığı Medîne-i Gelibolu piskoposu olup hâlâ mahmiye-i İstanbul’da Bahçekapısı kurbünde müsâferet vechi üzre sâkin Tanaş v. Yorgi nâm râhib tarafından husûs-ı câi’z-zikre vekîl olduğu Mustafa Bey b. Hasan el-Bostânî ve Abdullah b. Hızır şehâdetleriyle şer‘an sâbit olan Papa Kostanti v. Kosta nâm râhib meclis-i şer‘-i hatîrde mahmiye-i mezbûrede Abdi Subaşı Mahallesi’nde sâkin iken bundan akdem hâlik olan İstemat’ın sulbî kebîr oğulları ve vârisleri olan Dimitri ve Apastol nâm zimmîler muvâcehelerinde bi’l-vekâle ikrâr ve takrîr-i kelâm edip müvekkilim merkūmun silk-i mülkümde münselik olup medîne-i mezbûrede Ayayorgi Mahallesi’nde vâki‘ bir tarafdan Mihal mülkü ve bir tarafdan Yorgi mülkü ve bir tarafdan Kiryaloz nâm râhib mülkü ve bir tarafdan tarîk-ı âm ile mahdûd iki bâb fevkānî odayı ve bir sofa ve bir tahtânî mahzen ve zât-ı eşcâr-ı müsmire ve gayr-ı müsmire hadîkayı müştemil mülk menzilini cümle tevâbi‘ ve levâhıkı ile mezbûrân Dimitri [ve] Apasdol’a müvekkil-i merkūm Tanaş iki yüz doksan beş esedî guruşa tarafeynden îcâb ve kabûlü [hâvî] bey‘-ı kat‘î ile bey‘ edip onlar dahi ale’l-iştirâk iştirâ ve kabûl eyleyip semeni olan meblağ-ı mezbûr iki yüz doksan beş guruşu müvekkil-i merkūmun hâlik-i merkūma yedlerinde olan moleve? ta‘bîr olunur memhûr iki kıt‘a deyn temessükleri mûcebince zimmetlerinde edâsı lâzım deyni olan iki yüz doksan beş guruşa takās onlar dahi mukāssa ve kabûl [edip] menzil-i mahdûd-ı mezbûru mahâllinde zabt ve tasarrufa mezbûrân Dimitri ve Apastol’u taslît eyledi ba‘de’l-yevm menzil-i mezbûr merkūmânın mülk-i müşterâlarıdır keyfe mâ yeşâ’ mutasarrıflar olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm li-sene ihdâ ve tis‘în ve elf. Şuhûdü’l-hâl: Mustafa Çavuş b. Abdullah el-Mübâşir, Ömer Bey b. Osman, Mehmed Çelebi b. Haydar, Fettah Efendi b. el-kâtib.