Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 167 Hüküm no: 131 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âdile bt. Muhtâr’ın cariyesi Gülistan bt. Abdullah’ı azat ettiği Mahmiye-i İstanbul’da Beyceğiz Mahallesi’nde sâkine Âdile bt. Muhtâr nâm hatun tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iye ile ârifân Mehmed Çelebi b. Haydar ve Ahmed Çelebi b. Şa‘ban nâm kimesneler şehâdetleri ile şer‘an sâbit olan sulbî kebîr oğlu Mustafa Çelebi b. Ahmed nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilem mezbûre Âdile’nin kendüye rıkkıyetini mu‘terife olan orta boylu açık kaşlı elâ gözlü Rusiyyetü’l-asl bâ‘isetü hâze’l-kitâb Gülistan bt. Abdullah nâm câriye-i memlûkesini hasbeten lillâhi’l-Meliki’l-Hallâk ve taleben li-merzâti’r-Rabbi’r-Rezzâk mâlından tahrîr ve i‘tâk ve sâir harâir-i asliyât zümresine ilhâk ve idrâc eyledi ba‘de’l-yevm mevsûfe-i mezbûre Gülistan sâir harâir-i asliyât gibi hürre olup üzerinde velâ-i şer‘îden gayrı hakkı kalmadı dedi dedikde mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn mine’l-Muharremi’l-harâm li-sene ihdâ ve tis‘în ve elf. Şuhûdü’l-hâl: Reis Mehmed Efendi b. Osman Efendi, Ahmed Çelebi b. Piyale, Mustafa Çelebi b. ( ) Kâtib-i Ahkâm, Mustafa Çelebi b. Dilaver, Mehmed Çelebi b. Ahmed, Hasan Çelebi b. ( ), Musa Çelebi b. ( ).