Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 168 Hüküm no: 133 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın evini el-Hâc Davud b. Hüseyin’e sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i İstanbul’da Hadîce Sultân Mahallesi’nde sâkin es-Seyyid İbrahim Ağa b. Abdülkadir’in menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkine olup zâtını ma‘rifet-i şer‘iye ile ârifân mezbûr es-Seyyid İbrahim Ağa ve Yusuf Beşe b. Abdullah nâm kimesneler ta‘rîfleriyle mu‘arrefe olan Sâliha bt. Abdullah nâm hatun meclis-i ma‘kūd-ı mezbûrda işbu bâ‘isü’l-kitâb el-Hâc Davud b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin <> yedimde mülk ve hakkım olup mahmiye-i mezbûrede Derviş Ali Mahallesi’nde vâki‘ bir tarafdan vakıf menzil ve bir tarafdan Hasan Çavuş menzili ve iki tarafdan tarîk-ı âm ile mahdûd fevkānî bir oda ve tahtında bir dükkân ve tahtânî bir oda ve bir kenîfi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı kat‘î ile altmış esedî guruş ile min-haysü <<’l-mecmû‘>> ‘l-işâre ma‘lûme ve min-haysü’l-kemmiye mechûle bir kabza fülûs-ı muzayya‘a bey‘ ve teslîm ol dahi ber-vech-i muharrer iştirâ ve tesellüm edip semeni olan meblağ-ı mezbûr altmış kıt‘a esedî guruşu mezbûr el-Hâc Davud yedinden bi’t-tamam ve’l-kemâl ahz ü kabz eyledim min-ba‘d menzil-i mahdûd-ı mezbûrda alâka ve medhalim kalmayıp mezbûr el-Hâc Davud’un mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Mehmed Çelebi b. Cafer ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 28 mine’l-Muharremi’l-harâm li-sene 1091. Şuhûdü’l-hâl: Süleyman Bey b. Mehmed, Şahin Ağa b. Abdullah, Mahmud Beşe b. Abdullah, Mehmed Beşe b. Osman, Âşûr b. Mehmed, Ali Bey b. İbrahim ve gayruhum.