Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 171 Hüküm no: 137 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Çelebi ile Seyyid Nimetullah Çelebi’nin babalarından kalan evi Mustafa Çelebi b. Mehmed’e sattıkları Mahmiye-i İstanbul’da Ali Paşa-yı Atîk Mahallesi sâkinlerinden iken bundan akdem vefât eden Abdülvehhab nâm kimesnenin verâseti sulbî kebîr oğulları es-Seyyid Mehmed Çelebi ve es-Seyyid Ni‘metullah Çelebi’ye münhasıra olduğu şer‘an zâhir ve müte‘ayyin oldukdan sonra mezbûr es-Seyyid Mehmed Çelebi asâleten ve merkūm es-Seyyid Ni‘metullah Çelebi tarafından husûs-ı âti’l-beyânı ikrâra vekîl olup mahmiye-i mezbûrede Muhtesib İskender Mahallesi’nde sâkin el-Hâc Mehmed b. Hasan ve Müezzin Ömer Çelebi b. Mustafa nâm kimesneler şehâdetleriyle şer‘an vekâleti sâbite olan Müezzin Mehmed Çelebi b. Mehmed nâm kimesne vekâleten meclis-i şer‘-i şerîfde işbu râfi‘u’l-kitâb Mustafa Çelebi b. Mehmed mahzarında her biri ikrâr ve takrîr-i kelâm edip mûrisimiz müteveffâ-yı mezbûr Abdülvehhab’ın ile’l-vefât ebniyesi mülkü olup ve arsasının senede Ali Paşa-yı Atîk vakfına on akçe mukāta‘a-i kadîmesi olan mahalle-i mezbûrede vâki‘ bir tarafdan Hasan Efendi ve Şahin Bey mülkleri ve bir tarafdan Ali Paşa-yı Atîk Câmi‘-i Şerîfi bahçesi ve bir tarafdan kendi mülk menzilimiz ve bir tarafdan tarîk-ı âm ile mahdûd iki bâb tahtânî oda ve bir sofa ve bir dehliz ve bir kenîf ve bir bi’r-i mâ ve havlu ve eşcâr-ı müsmire ve gayr-ı müsmireli bahçeyi müştemil olan mülk menzili bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile <> mezbûr Mustafa Çelebi’ye otuz iki bin akçeye asâleten ve vekâleten her birimiz bey‘ ve temlîk ve teslîm ol dahi iştirâ ve kabûl ve tesellüm etdikden sonra semeni olan meblağ-ı mezbûr otuz iki bin akçeyi mezbûr Mustafa Çelebi yedinden bi’t-tamam alıp kabz eyledik fîmâ-ba‘d menzil-i mahdûd-ı mezbûr merkūm Mustafa Çelebi’nin mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 29 min-Muharrem sene [10]91. Şuhûdü’l-hâl: Kâtib Abdullah b. Mehmed, İmâm Mehmed Efendi b. Mehmed, İbrahim Çelebi b. Süleyman el-kayyûm, Şahin Bey b. Abdullah, es-Seyyid Abdullah Çelebi b. Ahmed, Berber Ali Çelebi b. Abdullah, Abdi Beşe b. Veli.