Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 171 Hüküm no: 136 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah ile karısı Fâtıma bt. Muslı’nın boşandıkları Mahmiye-i İstanbul’da Eğrikapı dâhilinde sâkin İbrahim b. Abdullah nâm kimesne meclis-i şer‘de zâtını ma‘rifet-i şer‘iye ile ârifân Mehmed b. Ahmed ve Ahmed b. Abdullah ta‘rîfleriyle mu‘arrefe olan işbu bâ‘isetü’l-kitâb Fâtıma bt. Muslı nâm hatun mahzarında üzerine da‘vâ ve takrîr-i kelâm edip mezbûre Fâtıma zevce-i menkûham iken yüz yirmi günden beri benimle mu‘âşeret-i zevciyetden imtinâ‘ eder suâl olunup mu‘âşeret etmek üzre mezbûreye tenbîh olunmak matlûbumdur dedikde gıbbe’s-suâl mezbûre Fâtıma cevâbında fi’l-hakīka ben mezbûr İbrahim’in zevce-i menkûhası olup nice eyyâm beynimizde zevciyet kāime idi lâkin târih-i kitâbdan yüz yirmi gün mukaddem esvâbımı <<âhara>> âhar menzile nakledip beni tatlîk eyle zimmetinde ma‘kūdün-aleyh olan iki bin akçe mehrim mutâlebesinden zimmetin berî olsun dediğimde ol dahi irâdetin elinde olsun deyip ben-dahi ol ân nefsimi murâd edip bu vechile mezbûr İbrahim’den mutallaka olmuşumdur deyü def‘le mukābele edicek gıbbe’l-istintâk mezbûr İbrahim cevâbında fi’l-hakīka târih-i mezbûrda mezkûre Fâtıma esvâbını âhar mahalle ba‘de’n-nakl beni tatlîk eyle dedikde kendi dahi irâdetin elinde olsun deyip merkūme Fâtıma dahi ol ân nefsini irâde etmekle kendiden mutallaka olduğunu bi’t-tav‘i’s-sâf ikrâr ve i‘tirâf etmeğin mûcebiyle mezbûre Fâtıma’ya bî-vech mu‘ârazadan mezbûr İbrahim men‘ olunup işbu vesîka bi’t-taleb ketb ü terkīm olundu. Fî 28 mine’l-Muharremi’l-harâm sene 1091. Şuhûdü’l-hâl: es-Seyyid Mehmed Çelebi b. Mehmed, Hasan b. Ali, Abdurrahman b. Mehmed, es-Seyyid Kasım b. Mehmed, Mehmed Çelebi b. Mustafa.