Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 173 Hüküm no: 139 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâkıye bt. Mehmed Efendi’nin vefat eden kocasının kethudası olan Hasan Beşe b. Abdullah’a açtığı alacak davasının reddedildiği Mahmiye-i İstanbul’da Tevkī‘î Cafer Çelebi Mahallesi ahâlîsinden olup Siros kādısı iken bundan akdem vefât eden merhûm Câlibîzâde Mehmed Efendi b. Abdurrahman Efendi’nin verâseti zevce-i metrûkesi Bâkıye bt. Mehmed Efendi ile li-ebeveyn karındaşı Salih Çelebi’ye münhasıra olduğu şer‘an sâbit ve zâhir oldukdan sonra mezbûre Bâkiye Hatun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Receb Ağa b. Ali ve Müezzin Mustafa Çelebi b. Abdullah nâm kimesneler şehâdetleri ile şer‘an sâbit olan Mehmed Çelebi b. Abdullah nâm kimesne meclis-i şer‘de müteveffâ-yı mezbûrun hayatında kethudâsı olan işbu bâ‘isü’l-kitâb Hasan Beşe b. Abdullah mahzarında bi’l-vekâle üzerine da‘vâ ve takrîr-i kelâm edip mezbûr Hasan Beşe müteveffâ-yı mezbûrun hayatında emriyle kendi masrafına yirmi üç bin akçe harc ve sarf eyledim deyü vefâtından sonra terekesinden isbât etmeksizin bi-gayr-ı vechin şer‘î on iki bin akçe ahz ü kabz etmekle mezbûr Hasan Beşe’ye suâl olunup meblağ-ı mezbûrdan müvekkilem mezbûreye isâbet eden üç bin akçeyi bana def‘ ü teslîme tenbîh olunmak matlûbumdur dedikde gıbbe’s-suâl mezbûr Hasan Beşe cevâbında ber-vech-i muharrer ben müteveffâ-yı mezbûrun hayatında kethudâsı iken emriyle kendi masrafına yirmi üç bin akçe harc ve sarf edip hatta hayatında medîne-i Siroz’da huzûr-ı Müslimînde bana minvâl-i muharrer üzre zimmetinde yirmi üç bin akçe deyni olduğunu ikrâr dahi edip kable’l-edâ vefât eylediğinden sonra müteveffâ-yı mezbûrun terekesine vâzı‘u’l-yed olan karındaşı mezbûr Salih Çelebi’nin vekîli olan Abdullah Efendi ve müvekkile-i mezbûrenin mukaddemâ vekîli olan Murtaza Efendi yedlerinden bi-tarîkı’s-sulh ber-vech-i muharrer on iki bin akçe ahz ü kabz edip mâ‘adâsı olan on bir bin akçe da‘vâsından zimmetini ibrâ etmişidim deyü def‘ ile mukābele edicek gıbbe’l-istintâk ve’l-inkâr mezbûr Hasan Beşe’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Yarhisar Mahallesi’nde sâkin müteveffâ-yı mezbûrun hayatında hizmetinde olan İbrahim Bey b. Mehmed ve Sekbân Ali Medresesi’nde sâkin Molla Mehmed b. İbrahim nâ[m] kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mehmed Efendi hayatında medîne-i Siroz’da bizim huzûrumuzda kethudâsı olan mezbûr Hasan Beşe için emrimle masrafıma yirmi üç bin akçe harc ve sarf edip hâlâ meblağ-ı mezbûr yirmi üç bin akçe kethudâm mezbûr Hasan Beşe’ye zimmetimde vâcibü’l-edâ ve lâzımü’l-kazâ deynimdir deyü ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince vekîl-i mezbûr bî-vech mu‘ârazadan [men‘] birle mâ-vaka‘a bi’t-taleb ketb olundu. Fi’l-yevmi’s-sâlis min-Saferü’l-hayr li-sene ihdâ ve tis‘în ve elf. Şuhûdü’l-hâl: Hasan Ağa b. Muslı, Berber Mustafa Çelebi b. Şa‘ban, Osman Beşe b. Abdullah, Ahmed Beşe b. Ali, Hasan b. Hüseyin, Mehmed Çelebi b. Haydar.