Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 174 Hüküm no: 140 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Ali ile İlya v. Mihail’in sulh olduktan sonra birbirlerini ibra ettikleri Vilâyet-i Rumeli’nde nefs-i Yanya’da sâkin umdetü’l-eşbâh Mehmed Ağa b. Ali mahfil-i şer‘-i şerîf-i enverde yine Yanya’da kal‘a dâhilinde sâkin râfi‘u hâze’r-rakīm İlya v. Mihail mahzarında ikrâr-ı tâm ve takrîr-i kelâm edip ben bundan akdem Yanya mütesellimi olmağla merkūm İlya’nın zevcesi Liye bt. Metabe nâm Yahûdiye hâlike oldukda merkūm İlya merkūme Liye maktûle olmuşdur deyü benden bi-gayr-ı hakkın üç yüz esedî guruş almışidin deyü mezbûru benden da‘vâ eyledikde muslihûn tavassut edip mezbûr İlya ile beynimizde dokuz bin akçe üzerine akd-i musâlaha olundukda mezbûr İlya dahi sulh-i mezbûru kabûl ve bedel-i sulh-i mezkûru yedimden ahz <> ve ziyâdeye müte‘allika âmme-i da‘vâdan beni ibrâ etmeğin ben-dahi bedel-i sulh deyü merkūm olan meblağ-ı mezbûr dokuz bin akçeye müte‘allik âmme-i da‘vâdan mezbûr İlya’yı ibrâ ve ıskāt eyledim benim dahi mezbûr ile kat‘a da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa b. Mehmed, Hasan Ağa b. Mehmed, Zeynel Ağa b. Mehmed, Hüseyin Ağa b. Mehmed.