Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 188 Hüküm no: 157 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Kulu’nun kefil olduğu borcu Ahmed Efendi b. Mehmed Efendi’ye ödemesi Havâss-ı Refî‘a kazâsı muzâfâtından Sütlüce’de Mahmud Ağa Mahallesi’nde sâkin zümre-i kuzâtdan sahibü hâze’l-kitâb Ahmed Efendi b. Mehmed Efendi meclis-i şer‘-i şerîf-i enverde mahmiye-i İstanbul’da Mehmed Ağa Câmi‘-i Şerîfi kurbünde merhûm Şeyhülislâm Yahya Efendi odalarında sâkin Mustafa b. Kulu nâm kimesne mahzarında üzerine da‘vâ ve takrîr-i kelâm edip ben bin seksen sekiz senesinde Vidin kādısı olmağla sene-i mezkûre Şa‘bânı gurresinde Vidin nâzırı olan İbrahim Bey nâm kimesneye sekiz yüz esedî guruş ikrâz ve teslîm ol dahi iktirâz ve kabz ve tesellüm eyledikde merkūm Mustafa meblağ-ı mezbûr sekiz yüz esedî guruşa emir ve kabûlü hâviye kefâlet-i sahîha-i şer‘iye ile kefîl olmuşdu hâlâ suâl olunup meblağ-ı mezbûrun bi-hükmi’l-kefâle mezbûr Mustafa’dan alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mübeyyine [beyyine] taleb olundukda udûl-i Müslimînden olup zikrolunan Mahmud Ağa Mahallesi’nde sâkin Rahmetullâh Efendi b. Mehmed ve zikrolunan Mehmed Ağa Câmi‘-i Şerîfi kurbünde sâkin İbrahim b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Ahmed Efendi bin seksen sekiz senesi Şa‘bânı gurresinde Vidin kādısı iken Vidin nâzırı olan merkūm İbrahim Bey’e ikrâz ve teslîm ol dahi iktirâz ve kabz ve tesellüm eylediği meblağ-ı mezbûr sekiz yüz esedî guruşa mezbûr Mustafa bizim huzûrumuzda emir ve kabûlü hâviye kefâlet-i sahîha-i şer‘iye ile kefîl oldu biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet eylediklerinde mezbûrânı ta‘dîl ve tezkiye için savb-ı şer‘-i kavîmden irsâl olunan Mustafa Efendi b. Abdülaziz zikrolunan Mahmud Ağa Mahallesi’ne varıp ahâlîsinden el-Hâc Mehmed Efendi b. Ahmed ve Abdi Odabaşı b. Mustafa ve Mustafa Ağa b. Mehmed ve el-Hâc Mehmed b. Abdullah ve Berber Mustafa Çelebi b. Abdünnebi ve Ali b. Abdullah ve Hasan b. Abdi ve Mehmed b. Halil ve Mehmed b. İsmail’den merkūm İbrahim’in hâli[ni] istikşâf etdikde mezbûrûnun her biri mezbûr İbrahim’in ad[l] ve makbûlü’ş-şehâde olduğunu haber verdiklerinden sonra zikrolunan Mehmed Ağa Mahallesi’ne varıp ahâlîsinden İmâm Süleyman Efendi b. Mehmed ve Müezzin Mehmed Efendi b. Mehmed ve Mustafa b. Mehmed ve el-Hâc Hüseyin Ağa b. İbrahim ve el-Hâc Mustafa b. Sinan ve İbrahim Efendi b. Rasûl ve Ahmed Beşe b. Abdullah’dan merkūm Rahmetullâh Efendi’nin keyfiyet-i hâlini istihbâr etdikde mezbûrûnun her biri şâhid-i mezkûrun adl ve makbûlü’ş-şehâde olduğunu haber vermeğin vâki‘ hâli mezbûr Mustafa Efendi mahâllinde ketb ve terkīm edip ba‘dehû cânib-i şer‘den ma‘an ba‘s olunan Hasan b. Ahmed ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’[l-yevmi]’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Nasuh Ağa b. ( ), el-Hâc İbrahim Ağa b. ( ), Muhzırbaşı Osman Ağa, Ahmed Efendi b. ( ), Mehmed Efendi b. Piyale, Ni‘metullah Efendi b. Mehmed, Mehmed Çelebi b. Haydar, Karakız Ahmed Çelebi b. Abdurrahman, Hasan Çelebi b. ( ), Ali Çelebi b. Şa‘ban.