Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 187 Hüküm no: 156 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Mehmed’in Ali Bey b. Davud’a olan borcunu ödemesi Mahmiye-i İstanbul’da Sultân Bâyezid Han Câmi‘-i Şerîfi kurbünde sâkin işbu bâ‘isü’l-kitâb Ali Bey b. Davud meclis-i şer‘-i şerîf-i enverde Mustafa Ağa b. Mehmed mahzarında üzerine da‘vâ ve takrîr-i kelâm edip mezbûr Mustafa Ağa zimmetinde cihet-i karz-ı şer‘îden sekiz yüz esedî guruş hakkım olup meblağ-ı mezbûrdan dört yüz [yetmiş] yedi esedî guruşunu vekîlim diğer Mustafa Ağa yediyle ahz ü kabz edip bâkī üç yüz yirmi üç esedî guruş hakkım kalıp hatta mezbûr Mustafa Ağa meblağ-ı mezbûrun altmış üç esedî guruş deynini nâtık yedimde başka temessük olmağın târih-i kitâb senesi Muharremi’l-harâmı gurresinde meblağ-ı mezbûr altmış üç esedî guruşdan mâ‘adâ iki yüz altmış esedî guruş dahi zimmetinde deyni olduğunu alâ-ruûsi’l-istişhâd [işhâd] ikrâr ve yedime hat ve hatmini hâvî müştemil deyn temessükü vermiş-iken hâlâ meblağayn-ı mezbûreyn cem‘an üç yüz yirmi üç esedî guruşu bana edâdan imtinâ‘ eder suâl olunup alıverilmesi matlûbumdur deyü zikrolunan altmış üç esedî guruşu nâtık deyn temessükü ile imzâ ve hatmini hâvî târih-i mezkûr ile müverrah ve meblağ-ı mezbûr iki yüz [40a] altmış esedî [guruş] deynini nâtık temessük ibrâz etmeğin gıbbe’s-suâl mezbûr Mustafa Ağa cevâbında fi’l-hakīka müdde‘î-i mezbûra zikrolunan altmış üç esedî guruş karz-ı şer‘îden lâzı[mü]’l-edâ deyninden mâ‘adâ târih-i kitâb senesi Muharremi’l-harâmının gurresinde müdde‘î-i mezbûra cihet-i mezkûreden iki yüz altmış esedî guruş lâzımü’l-edâ deyni olduğunu ikrâr ve yedine hat ve hatmini hâvî deyn temessükü verip iki temessükde münderic cem‘an üç yüz yirmi üç esedî guruş lâzımü’l-edâ deyni olduğunu tav‘an ikrâr ve i‘tirâf etmeğin alâ-mûceb-i i‘tirâfihî meblağ-ı mezbûr üç yüz yirmi üç esedî guruşu müdde‘î-i mezbûra edâ ve teslîme mezbûr Mustafa Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Mehmed b. Ahmed, Abdullah Efendi, Mehmed Çelebi b. Haydar, Ebûbekir Efendi b. ( ).