Bab Mahkemesi 54 Numaralı Sicil (H. 1102 / M. 1691) cilt: 20, sayfa: 327 Hüküm no: 391 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Kömürcü Mustafa’nın Hacı Ahmed b. Ali’ye olan borcu için terekesindeki menzillerinin satılması Mahmiye-i İstanbul’da el-Hâc İlyas mahallesinde sâkin iken bundan akdem vefât eden İbrahim Ağa b. Kömürcü Mustafa Ağa nâm kimesnenin verâseti, sulbî kebîr oğlu Süleyman Ağa ve kebîre kızı Emine Hâtun’a münhasıra olduğu mütehakkik oldukdan sonra mezbûr Süleyman Ağa kendi tarafından asâleten ve kız karındaşı mezbûre Emine Hâtun tarafından husûs-ı âti’l-beyâna vekîl olduğu İbrahim Bey b. Abdülbâki ve Mehmed Bey b. Cafer nâm kimesneler şehâdetleriyle sâbit olmağla vekâleten meclis-i şer‘-i şerîf-i enverde, deryâ* beylerinden fahrü’l-ümerâ bâ‘isü hâze’l-kitâb Solakzâde el-Hâc Ahmed Bey b. Ali nâm kimesne mahzarında ikrâr ve takrîr-i kelâm edip, mûrisimiz müteveffâ-yı mezbûrun terekesinden olup medîne-i Ebâ Eyyûb el-Ensârî’de el-Hâc Hüsrev mahallesinde vâki‘ iki tarafdan makābir-i müslimîn ve bir tarafdan vakıf menzil ve bir tarafdan tarîk-i âm ile mahdûd fevkānî ve tahtânî on dört bâb mülk odalarımızın el-Hâc Ahmed Bey’e asâleten ve vekâleten tarafeynden îcâb ve kabûlü hâvî bey‘-i bâtt-ı sahîh-i şer‘î ile bin guruşa bey‘ ve teslîm, ol dahi ber vech-i muharrer iştirâ ve tesellüm ettiğinden sonra semeni olan meblağ-ı mezbûr bin guruşu babam müteveffâ-yı mezbûrun merkūm el-Hâc Ahmed Bey’e üç bin beş yüz kırk dokuz buçuk guruş deyni olmağla, deyn-i mezbûrun bin guruşuna takās edip mezbûr el-Hâc Ahmed Bey dahi mukāssa kabûl eyledi. Ba‘de’l-yevm sâlifü’z-zikr on dört bâb odalar mesfûr Ahmed Bey’in mülk-i müşterâsıdır, keyfe mâ yeşâ mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire sene 1102. Şuhûdü’l-hâl: El-Hâc Ahmed b. İsmail, Ali Beşe b. İsmail, Ahmed Çelebi b. Osman, el-Hâc Hüseyin, el-Hâc Osman el-kasab, Ali Çavuş b. ( ), el-Hâc Yusuf.