Bab Mahkemesi 54 Numaralı Sicil (H. 1102 / M. 1691) cilt: 20, sayfa: 326 Hüküm no: 390 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Ali’nin Mehmed b. Ramazan’da olan alacağının tahsil edilmesi Mahmiye-i İstanbul’da (…) mahalle sükkânından İbrahim b. Ali nâm kimesne meclis-i şer‘-i enverde, el-Hâc Mehmed b. Ramazan mahzarında üzerine da‘vâ ve takrîr-i kelâm edip, mezbûr el-Hâc Mehmed’in vâlidesi gāibe ani’l-meclis Peri Hâtun bt. Hasan nâm hâtun zimmetinde cihet-i deyn-i şer‘îden otuz guruş hakkım olup, meblağ-ı mezbûru taleb eylediğimde, mezbûr el-Hâc Mehmed vâlidesi mezbûre tarafından bi’l-vekâle da‘vâ-yı mezkûremden benimle yirmi guruş üzerine sulh oldukda, ben dahi sulh-ı mezbûru ba‘de’l-kabûl bedel-i sulh olan meblağ-ı mezbûrun on guruşunu bundan akdem yedinden ahz u kabz edip, bâkī on guruşu taleb ederim suâl olunup alıverilmesi matlûbumdur dedikde, gıbbe’s-suâl mezbûr el-Hâc Mehmed cevâbında, hâl bâlâda bast olan minvâl üzre olup, bedel-i sulh olan meblağ-ı mezbûrdan bâkī on guruşu dahi müdde‘î-i mezbûra deyni olduğu bi’t-tav‘i’s-sâf ikrâr ve i‘tirâf etmeğin, alâ mûcebi ikrârihî meblağ-ı bâkī-i mezbûr on guruşu dahi müdde‘î-i mezbûra edâ ve teslîme mezbûr el-Hâc Mehmed’e tenbîh birle, gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-ışrîn min Cumâdelâhire sene 1102. Şuhûdü’l-hâl: Mustafa b. Şaban, el-Hâc Ali b. Abdülmennân, İbrahim Çelebi b. Ahmed, Ahmed b. Ahmed Abdullah Efendi el-kâtib, Nuh Efendi el-kâtib.