Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 223 Hüküm no: 198 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ali’nin vefat eden kocasından miras kalan evin kendisine düşen hissesini Hüseyin Ağa’ya sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i enverden irsâl olunan Mevlânâ Ebûbekir Efendi b. Abdülkerim sâbıkā medîne-i Yenişehir kādısı olan umdetü’l-mevâli’l-izâm zübdetü’l-fudalâi’l-fihâm Mustafa Efendi hazretlerinin mahmiye-i İstanbul’da Çukur Bostan kurbünde vâki‘ sa‘âdethânelerine varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i şerîf-i Nebevî etdikde mahmiye-i mezbûrede Kesmekaya kurbünde sâkin iken bundan akdem vefât eden Nûşirevân Ali Ağa b. Mustafa’nın verâseti zevce-i metrûkesi Fâtıma bt. Ali nâm hatun ile li-ebeveyn er karındaşı Hüseyin’e [50a] ve sulbiye sagīre kızı Âişe’ye münhasıra ve tashîh-i mes’elesi sekiz sehimden olup sihâm-ı mezbûreden bir sehmi mezbûre Fâtıma’ya ve dört sehmi sagīre-i mezbûre Âişe’ye ve üç sehmi mezbûr Hüseyin’e isâbet eylediği şer‘an zâhir ve müte‘ayyin oldukdan sonra zâtını ma‘rifet-i şer‘iye ile ârifân Ali Ağa b. Ebûbekir ve Mehmed Bey b. Kenan ta‘rîfleriyle mu‘arrefe olan mezbûre Fâtıma meclis-i ma‘kūd-ı mezbûrede râfi‘u hâze’l-kitâb es-Seyyid Hüseyin Ağa b. es-Seyyid Mahmud mahzarında ikrâr-ı tâm ve takrîr-i kelâm edip zikrolunan Kesmekaya kurbünde Hoca Kasım Gönânî Mahallesi’nde vâki‘ iki tarafdan Mahmudzâde Ali Efendi menzil ve bostanı ve bir tarafdan Memi Çavuş veresesi mülkleri ve bir tarafdan tarîk-ı âm ile mahdûd hâriciyesinde tabaka-i ulyâsı iki bâb oda ve bir kebîr orta sofa ve dehliz ve bir yan sofası ve bir mâbeyn odası ve tabaka-i vustâsı üç oda ve bir kenîf ve tabaka-i süflâsı bir ahır ve bir su kuyusu ve bir cüneyne arsasını ve dâhiliyesinde tabaka-i ulyâsı bir oda ve dehliz ve tabaka-i vustâsı dört bâb oda ve bir kenîf ve dehliz ve tabaka-i süflâsı bir matbah ve bir mahtab ve bir mikdâr cüneyne arsası ve bir su kuyusu ve bir harâbe matbahı müştemil bir bâb mülk menzil müteveffâ-yı mezbûrun ile’l-vefât silk-i mülkünde münselik olup ba‘de-vefâtihî hesâb-ı mezkûr üzre bir sehmi bana ve dört sehmi sagīre-i mezbûre Âişe’ye ve üç sehmi merkūm Hüseyin’e isâbet ve intikāl etmeğin hâlâ menzil-i mahdûd-ı mezkûrda olan bir sehim hisse-i şâyi‘amı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr es-Seyyid Hüseyin Ağa’ya yüz on iki buçuk esedî guruşa bey‘ ve temlîk ve teslîm ol dahi ber-vech-i muharrer iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz on iki buçuk esedî guruşu mezbûr es-Seyyid Hüseyin Ağa yedinden tamamen alıp kabz ve tesellüm eyledim fîmâ-ba‘d menzil-i mahdûd-ı mezkûrda olan bir sehim hisse-i şâyi‘am merkūm es-Seyyid Hüseyin Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î vâki‘ hâli mezbûr Ebûbekir Efendi mahâllinde ketb ve tahrîr edip ba‘dehû ma‘an ba‘s olunan Molla Hasan b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi el-müşâru ileyh, umdetü’l-eşbâh Kasabbaşı Ahmed Ağa, umdetü’l-müderrisîn Yahya Efendi b. Şa‘ban, Hasan Efendi b. Süleyman, Mehmed Efendi b. Himmet, Hüsameddin Ağa, Mehmed Ağa b. ( ), umdetü’l-müderrisîni’l-kirâm Ahmed Efendi, Hasan Çelebi b. İbrahim.