Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 222 Hüküm no: 197 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hasan’ın evini Osman adlı küçük çocuğun vasîsine istiğlal yoluyla sattığı Medîne-i Hazret-i Ebî Eyyûb-i Ensârî mahallâtından Baba Haydar-ı Nakşibendî Mahallesi’nde sâkine Havva bt. Hasan nâm hatun meclis-i şer‘-i hatîr-i lâzımü’t-tevkīrde mahmiye-i İstanbul’da Koğacı Dede Mahallesi’nde sâkin iken bundan akdem vefât eden el-Hâc Mustafa’nın sulbî sagīr oğlu Osman’ın tesviye-i emrine kıbel-i şer‘den mansûb vasîsi olan Hasan Bey b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup zikrolunan Baba Haydar-ı Nakşibendî Mahallesi’nde vâki‘ bir tarafdan Medîne-i Münevvere vakfı olan menzil ve bir tarafdan Süleyman Ağa mülkü ve bir tarafdan İbrahim Dede mülkü ve bir tarafdan tarîk-ı âm ile mahdûd olup fevkānî bir bâb odayı ve tahtânî bir bâb odayı ve zât-ı eşcâr-ı müsmire ve gayr-ı müsmire bahçeyi ve müşterek bir su kuyusunu müştemil olan mülk menzilimi cümle tevâbi‘iyle yüz kıt‘a esedî guruşa bi-tarîkı’l-istiğlâl vasîyy-i mezbûr Hasan Bey’e bey‘ ve teslîm ol dahi ber-vech-i muharrer iştirâ ve tesellüm eylediğinden sonra semeni olan meblağ-ı mezbûr yüz kıt‘a esedî guruşu yedinde olan sagīr-i mezbûrun mâlından bana def‘ ü teslîm ben-dahi tamamen ahz ü kabz eylediğimden sonra vasîyy-i mezbûr Hasan Bey menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan bir sene tamamına değin on beş esedî guruşa bana îcâr ve teslîm ben-dahi istîcâr ve tesellüm ve kabûl eylediğimden sonra eğer meblağ-ı mezbûru ve ücret-i mezbûreyi târih-i kitâbdan bir sene tamamına değin vasîyy-i mezbûra edâ ve teslîm edemez isem menzil-i mezbûru semen-i misli ile bey‘e ve kabz-ı semene ve semeninden deyn-i mezbûru edâya ve fazlasını bana îsâle ve îsâl mütevakkıf olduğu umûrun küllîsine küllemâ azeltüke fe-ente vekîlî mazmûnu üzre azl ve in‘izâlden masûne vekâlet-i devriye ile tarafımdan işbu hazır bi’l-meclis Hüseyin Efendi b. Mustafa’yı vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesin edâya ta‘ahhüd eylediğinden sonra mukırra-i mezbûrenin kızının kızı işbu hazır bi’l-meclis Râbia bt. Ahmed nâm hatun dahi meblağ-ı mezbûr ile ücret-i mezbûreye tarafeynden [tarafından] emir ve kabûlü hâviye kefâlet-i sahîha ile ben-dahi kefîl oldum dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi b. Haydar, Ali Bey b. ( ), Abdullah Çelebi b. ( ), Hasan Beşe b. Abdullah, Mehmed Çelebi b. Haydar.