Bab Mahkemesi 54 Numaralı Sicil (H. 1102 / M. 1691) cilt: 20, sayfa: 331 Hüküm no: 396 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis b. Hacı Hüseyin’in gemisinde çalışanların ücretlerini aldıkları Sefîne reislerinden Mustafa Reis b. el-Hâc Hüseyin nâm kimesnenin sefînesinde mellâh olup kendi tarafından asıl ve sâir ma‘lûmü’l-esâmi ve mahsûrü’l-eşhâs sefîne-i mezbûrede mellâhîn taraflarından vekîl olan Yorgi v. Aposdol ve Kostantin v. Kirkor ve Anton v. diğer Kostantin ve Yorgi v. Niko ve Kostantin nâm zimmîler meclis-i şer‘-i şerîfde, bâ‘isü’l-kitâb merkūm Mustafa Reis mahzarında her biri takrîr-i kelâm ve bast-ı merâm edip, bundan akdem ben mezbûr Mustafa Reis’in sefînesinde mellâh olup İstanbul’dan İzmir’e varıp, İzmir’de sefîne-i mezbûreye navl ile emti‘a-i mütenevvi‘a tahmîl ve tahammül ve İstanbul’a geldiğimizde emti‘a-i mezkûreyi sefîne-i mezbûreden ba‘de’l-ihrâc ehl-i hibremiz Ali Kapudan b. Mustafa ma‘rifetleriyle hâsıl olan navl-ı merkūm Mustafa Reis ile hesâb ettiğimizde, ba‘de külli hesâb navl-ı mezbûr kırk bin yirmi dokuz akçeye bâliğ olup, mu‘tâd-ı kadîm üzre lâzım gelen zihâb u iyâb kumanyası ve sefîne harcı ve sâir mesârif-i mühimme ihrâc olundukdan sonra bâkī kalan yirmi bin üç yüz dokuz akçeden ecr-i mislimiz mukābelesinde her birimize isâbet eden üçer yüz yirmi sekizer akçe payımızı merkūm Mustafa Reis bize def‘ ve teslîm, biz dahi yedinden ahz u kabz eyledik. Ba‘de’l-yevm merkūm Mustafa Reis ile navl-ı mezbûre müte‘allik kat‘â da‘vâ ve nizâ‘ımız kalmadı dedikde, gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire sene 1102. Şuhûdü’l-hâl: Mehmed Çavuş b. Ahmed mübâşir, İbrahim Beşe b. Hasan, Çukadâr el-Hâc Hasan, Mustafa Çelebi b. ( ) ve gayruhüm.