Bab Mahkemesi 54 Numaralı Sicil (H. 1102 / M. 1691) cilt: 20, sayfa: 330 Hüküm no: 395 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Receb’in terekesinin emânetçiden alınıp varislerine teslimi Fi’l-asl vilâyet-i Anadolu’da Gedegıra kazâsına tâbi‘ Bağcı nâm karye sükkânından olup, mahmiye-i İstanbul’da sâbıkan defterdâr olan Yusuf Efendi’nin hizmetinde iken vefât eden Hüseyin b. Receb b. Ahmed’in verâseti, karye-i mezbûrede sâkine li ebeveyn karındaşları Hasan ve Mahmud ve Meryem ile sagīr karındaşları Mustafa ve Ahmed’e münhasıra olduğu şer‘an zâhir ve mütebeyyin oldukdan sonra sagīrân-ı mezbûrânın tesviye-i emirleri için kıbel-i şer‘den mansûb vasîleri ve merkūmân Hasan ve Meryem taraflarından husûs-ı âti’z-zikre vekîl olup, bimâ-hüve nehcü’s-sübût şer‘an vekâleti sâbite olan mezbûr Mahmud meclis-i şer‘-i şerîf-i enverde, tereke-i müteveffâ-yı mezbûre bi’l-emâne vaz‘-ı yed eden işbu bâ‘isü’l-kitâb Mehmed Çelebi b. Ali mahzarında ikrâr ve i‘tirâf edip, mezbûr Ahmed Çelebi müteveffâ-yı mezbûrun hîn-i vefâtında yanında mevcûd bulunup bi’l-emâne vaz‘-ı yed eylediği bir köhne siyah kilim ve bir kürk ve bir don ve iki köhne sâde ve bir sîm hancer ve bir kırmızı kavuk ve iki destâr ve bir cedîd kırmızı kuşak ve dört münakkaş makrama ve iki uçkur ve bir gömlek ve bir kırmızı çakşır ve bir kırmızı dolama ve bir ankarta? dolama ve bir cedîd kapama ve bir kalembey fes ve bir alaca zıbın ve bir peştamâl ve bir siyah hançer ve bir küçük kantar ve bir palan ve iki kantarma ve dört kem ayâr sîm parçası ve bir çift tabancalı tüfenk ve bir beyaz kebe ve bir yorgan ve bir fincan kutusu ve bir köhne palaska ile altmış buçuk frenkî altın ve on sekiz şerîf altın ve elli esedî guruşu mezbûr Mehmed Çelebi bana teslîm, ben dahi bi’t-tamâm ve’l-kemâl asâleten ve vesâyeten ve vekâleten ahz u kabz ve tesellüm eyledim, tereke-i müteveffâ-yı mezbûrdan merkūm Mehmed Çelebi yedinde bir şey kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene 1102. Şuhûdü’l-hâl: Abdullah Efendi b. İbrahim, Mustafa Bey b. Osman, el-Hâc Mustafa b. Hüseyin, Ahmed Çelebi b. Şaban, Ali Bey b. Abdullah, Ramazan Bey b. Mustafa.