Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 251 Hüküm no: 222 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mehmed’in vefat eden Şaban b. Abdullah’a olan borcu konusunda merhumun varisleriyle sulh olduğu Medîne-i Ebî Eyyûbi’l-Ensârî’de Topçular’da Süleyman Subaşı Mahallesi sükkânından iken bundan akdem vefât eden Şa‘ban b. Abdullah nâm kimesnenin verâseti zevce-i metrûkesi Âişe bt. Murad nâm hatun ile li-ebeveyn er karındaşı Durmuş nâm kimesneye münhasıra olduğu şer‘an zâhir ve müte‘ayyin oldukdan sonra mezbûrân Durmuş ve Âişe taraflarından husûs-ı âti’l-beyânı da‘vâ ve talebe ve ahz ü kabza ve lede’l-iktizâ sulh ve ibrâya vekîl olup mezbûre Âişe’nin zâtını ma‘rifet-i şer‘iye ile ârifân mahalle-i mezbûre imâmı olan Abdülkadir Efendi b. Osman ve Mehmed Çelebi b. Abdullah şehâdetleri ile şer‘an vekâleti sâbite olan Ali Hoca b. Mehmed nâm kimesne meclis-i şer‘de işbu râfi‘u’l-kitâb Ömer b. Mehmed nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr Ömer müteveffâ-yı mezbûr Şa‘ban ile işbu hazır bi’l-meclis Mustafa Beşe b. Bayram’dan hâl-i hayatında ve kemâl-i sıhhatinde bin seksen yedi senesi Muharremi’l-harâmının yedinci gününde ale’l-iştirâki’s-seviy yüz doksan esedî guruş iktirâz ve kabz ve tesellüm edip meblağ-ı mezbûr mukābelesinde silk-i mülkünde münselik olup medîne-i mezkûreye tâbi‘ Kağıdhâne nâm karyede vâki‘ bir tarafdan Ali Efendi mülkü ve bir tarafdan mîrî bahçe ve bir tarafdan karye-i mezbûre hamamı ve bir tarafı tarîk-ı âm ile mahdûd iki bâb fevkānî oda ve tahtında iki ahır ve bi’r-i mâ ve kenîf ve zât-ı eşcâr-ı müsmire ve gayr-ı müsmireyi müştemil bir bâb mülk menzilimi müteveffâ-yı mezbûr Şa‘ban ile merkūm Mustafa Beşe yedlerine rehin vaz‘ ve teslîm onlar dahi ber-vech-i muharrer ale’l-iştirâki’s-seviy irtihân ve kabûl ve kabz edip işbu hüccet-i şer‘iye dahi tahrîr olundukdan sonra meblağ-ı mezbûr yüz doksan esedî guruşdan kendinin hissesine isâbet eden doksan beş esedî guruşu kable’l-ahz merkūm Şa‘ban vefât etmekle meblağ-ı mezbûr doksan beş esedî guruş müvekkilân-ı mezbûrâna bi’l-irsi’ş-şer‘î isâbet ve intikāl etdiğinden sonra meblağ-ı mezbûr doksan beş esedî guruşu mezbûr Ömer’den bi’l-vekâle taleb ve da‘vâ eylediğimde ol dahi cevâbında meblağ-ı mezbûru müteveffâ-yı mezbûr Şa‘ban’a hayatında bi’t-tamam edâ ve teslîm edip meblağ-ı mezbûrdan zimmetim berî olmuşdur demekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezkûremden mezbûr Ömer ile beni yirmi beş esedî guruş üzerine inşâ-i akd-i sulh eylediklerinde ben-dahi sulh-i mezbûru bi’l-vekâle kabûl ve bedel-i sulh olan meblağ-ı mezbûr yirmi beş esedî guruşu mezbûr Ömer yedinden bi’t-tamam ve’l-kemâl ahz ü kabz edip ziyâdeye ve bi’l-cümle müteveffâ-yı mezbûrun terekesine müte‘allika âmme-i da‘vâ ve muhâsamât ve eymân [ve] mutâlebâtdan mezbûr Ömer’in zimmetini ibrâ-yı âmm-ı kātı‘u’n-nizâ‘la bi’l-vekâle ibrâ ve ıskāt edip ol dahi bedel-i sulh deyü bana medfû‘u olan meblağ-ı mezbûr yirmi beş esedî guruşa ve bi’l-cümle müteveffâ-yı mezbûrun terekesine müte‘allika âmme-i da‘vâ ve muhâsamât ve eymân ve mutâlebâtdan müvekkilân-ı mezbûrân Durmuş ve Âişe ile benim zimmetimi ibrâ-yı âmm-ı kātı‘u’n-nizâ‘la ibrâ ve ıskāt eyledi min-ba‘d her birinin âhar ile vechen mine’l-vücûh da‘vâ ve nizâ‘ı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’[l-yevmi’]r-râbi‘ ve’l-işrîn min-Saferü’l-hayr li’s-seneti’l-mezbûre. Şuhûdü’l-hâl: Abdülkadir Efendi b. ( ) el-imâm, Mustafa Beşe b. Abdullah, el-Hâc Ramazan b. Şa‘ban, Şa‘ban Bey b. Muslı, Mehmed b. Ali el-müezzin, Süleyman Beşe b. Ahmed.