Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 253 Hüküm no: 223 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Bayram’ın vefat eden ortağı Şaban b. Abdullah tarafından kendisine sermaye olarak verilen meblağ hususunda merhûmun varisleriyle sulh olduğu Medîne-i Hazret-i Ebî Eyyûb-i Ensârî’de Topçular’da Süleyman Subaşı Mahallesi’nde sâkin iken bundan akdem vefât eden Şa‘ban b. Abdullah’ın verâseti zevce-i metrûkesi Âişe bt. Murad ile li-ebeveyn karındaşı Durmuş nâm kimesneye münhasıra olduğu şer‘an zâhir ve müte‘ayyin oldukdan sonra mezbûrân Âişe ve Durmuş taraflarından husûs-ı âtîyi sulh ve ibrâya vekîl olduğu yedinde mazmûnu müsbit hüccet-i şer‘iye ile şer‘an sâbit olan Ali Beşe b. Mehmed meclis-i şer‘de işbu bâ‘isü’l-kitâb Mustafa Beşe b. Bayram nâm kimesne mahzarında bi’l-vekâle ikrâr ve takrîr-i kelâm edip mezbûr Mustafa Beşe müteveffâ-yı mezbûrun hayatında şerîki olmağla müteveffâ-yı mezbûr hayatında sermâye olmak üzre merkūm Mustafa Beşe’ye yüz kırk beş esedî [guruş] def‘ ve teslîm ol dahi ba‘de’l-ahz ve tesellüm i‘mâl eylediğinden sonra meblağ-ı mezbûru kable’l-ahz vefât etmekle meblağ-ı mezbûr müvekkillerim mezbûrâna intikāl etmeğin hâlâ vekâletim hasebiyle meblağ-ı mezbûru ve hâsıl olan nemâsını mezbûr Mustafa Beşe’den taleb ve da‘vâ eylediğimde beynimizde nizâ‘-ı küllî vâkı‘a olmuşidi muslihûn tavassut edip da‘vâ-yı mezkûremden merkūm Mustafa Beşe ile elli esedî guruş üzerine [59b] beynimizde inşâ-i akd-i sulh ettiklerinde ben-dahi bi’l-vekâle sulh-i mezbûru kabûl ve bedel-i sulh olan meblağ-ı mezbûr elli esedî guruşu mezbûr yedinden bi’t-tamam ahz ü kabz edip meblağ-ı mezbûr yüz kırk beş esedî guruşa ve tamamına müte‘allika cemî‘ da‘vâdan merkūm Mustafa Beşe’nin zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Abdülkadir Efendi b. Osman el-imâm, Mehmed b. Abdullah, Osman b. Bayram, Ahmed b. Abdullah, Ali b. Abdullah, Musa Bey b. Hüseyin, Hasan b. Mehmed, Mustafa Ağa b. Ali.