Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 262 Hüküm no: 231 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Ağa b. Hüseyin’in Safiye Hatun’a olan borcunu ödemesi Bundan akdem şeyhülislâm olup vâsıl-ı huld-i berîn olan merhûm Yahya Efendi b. Ömer’in kerîme-i mükerremeleri umdetü’l-muhadderât Safiye Hatun tarafından husûs-ı âti’l-beyâna vekîl olup yine merhûm-ı müşârün-ileyhin etbâ‘ından zât-ı mezbûreyi ma‘rifet-i şer‘iye ile ârifân Abdülhalim Efendi b. Abdurrahman ve Abdülbaki b. Ramazan şehâdetleriyle şer‘an vekâleti sâbite olan Receb Beşe b. Mehmed meclis-i şer‘-i şerîf-i enverde Havâss-ı Refî‘a muzâfâtından Hasköy’de Turşucu Mahallesi’nde sâkin sâbıkā Kıbrıs defterdârı olan Ramazan Ağa b. Hüseyin mahzarında bi’l-vekâle üzerine da‘vâ ve takrîr-i kelâm edip müvekkilem müşârün-ileyhânın mezbûr Ramazan Ağa zimmetinde cihet-i karz-ı şer‘îden işbu hüccet-i şer‘iye nâtıka olduğu üzre bin esedî guruş ve yedinden müşterâ ve makbûz ve cins ve vasıfları mâbeynlerinde ilm-i şer‘î ile ma‘lûm dülbend-i dest ve inâyet ve hâre ve hamam rahtları ve dikdik ve kutnu ve sof semenlerinden dahi bin esedî guruş ki cem‘an iki bin esedî guruş hakkı olup meblağ-ı mezbûrdan üç yüz altmış altı buçuk esedî guruşu mukābelesinde müvekkile-i müşârün-ileyhâya beş donluk sâye çuka ve altı re’s bargir ve bir sîm balta ve iki sîm haydarî raht ve yirmi beş buçuk zirâ‘ Sakız kemhâsı ve üç donluk kumaş ve bir sîm debbûs, üç sîm gaddâre ve bir kılıç ve bir dikdik ve bir atlas mak‘ad ve üç sûzenî mak‘ad teslîm ol dahi ahz ü kabz ve tesellüm edip bâkī bin altı yüz otuz üç buçuk esedî guruşu kalmışdır suâl olunup takrîri tahrîr ve meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr Ramazan Ağa cevâbında fi’l-hakīka müvekkile-i müşârün-ileyhâ Safiye Hatun’a cihet-i karz-ı şer‘îden bin esedî guruş ile yedinden iştirâ ve kabz eylediğim eşyâ-i mezkûre semenlerinden dahi bin esedî ki min-haysü’l-mecmû‘ iki bin esedî guruş deynim olup meblağ-ı mezbûrdan üç yüz altmış altı buçuk esedî guruşu mukābelesinde vekîl-i mezbûrun i‘tirâfı olan eşyâ-i mezkûreyi teslîm ol dahi ahz ü kabz ve tesellüm edip mâ‘adâ bin altı yüz otuz üç buçuk esedî guruşu hâlâ müvekkile-i müşârün-ileyhâya zimmetimde lâzımü’l-edâ ve vâcibü’l-kazâ deynim olup ve ber-vech-i meşrûh kendüye teslîm eylediğim eşyâ-i mezkûreye ve semenlerine ve sâir beynimizde cereyân eden ahz ü i‘tâ ve mu‘âmelât-ı şettâya müte‘allika bi-vechin mine’l-vücûh da‘vâ ve nizâ‘ım yokdur deyü bi’t-tav‘i’s-sâf ikrâr ve i‘tirâf etmeğin alâ-mûceb-i i‘tirâfihî meblağ-ı mezbûr bin altı yüz otuz üç buçuk esedî guruşu edâ ve teslîme merkūm Ramazan Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Abdülhalim Efendi b. el-müderris, el-Hâc Veli b. Eyüb, Abdülbaki b. Ramazan, Mehmed b. Mehmed b. ( ), Mehmed Efendi b. Mustafa, Musa Efendi b. ( ).