Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 303 Hüküm no: 271 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşazâde Abdülkadir Paşa’nın Mehmed Bakizade Mustafa Çelebi ile nakit borcu dışında herhangi bir alacak verecek davası olmadığını beyan ettiği Hılâl-i sutûrda mastûr olan husûsu mahâllinde ketb ü terkīm için bi’l-iltimâs savb-ı şer‘den irsâl olunan İmâmzâde Mehmed Efendi b. Mustafa ümerâ-i Bahr-i Sefîd’den umdetü’l-ümerâi’l-kirâm Ali Paşazâde Abdülkadir Paşa’nın Kasımpaşa iskelesinde merbûta sefînesine varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i Nebevî eyledikde paşa-yı müşârün-ileyh meclis-i ma‘kūd-ı mezbûrda işbu bâ‘isü’l-kitâb Mehmed Bâkīzâde Mustafa Çelebi mahzarında bi’t-tav‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp mezbûr Mustafa Çelebi’nin babası mezbûr Mehmed ile hayatında ve ba‘de-vefâtihî oğlu mezbûr Mustafa Çelebi ile beynimizde ilm-i şer‘î ile ma‘lûm nice ahz ü i‘tâ ve mu‘âmelât-ı şettâ vâkı‘a olmağla mezbûr Mustafa Çelebi ile hâlâ hesâb gördüğümüzde mezbûr Mustafa Çelebi’ye ba‘de-külli’l-hesâb yedi bin yedi yüz yetmiş beş esedî guruş zimmetimde lâzımü’l-edâ ve vâcibü’l-kazâ deynim olup hatta yedine verdiğim temessükü ahz ü kabz eyledim meblağ-ı mezbûrdan mâ‘adâ mezbûr Mustafa Çelebi’nin bende hakkı olmayıp ve benim dahi babası müteveffâ-yı mezbûrda ve oğlu merkūmda bir akçe ve bir habbe hakkım ve mezbûr ile da‘vâ ve nizâ‘ım yokdur dedikde gıbbe’t-tasdîkı’l-mu‘teberi’l-vicâhî vâki‘ hâli mezbûr Mehmed Efendi mahâllinde ketb ve terkīm edip ba‘dehû cânib-i şer‘-i mübînden irsâl olunan Ahmed b. Ahmed ve Kenan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ali Bey b. Sinan, İbrahim Bey b. Abdülbaki Bey, Hasan Çelebi b. el-Hâc Mehmed, Mehmed Çelebi b. el-Hâc Mustafa, İsmail b. Ali, İbrahim Çavuş el-Mübâşir, Yusuf Ağa b. Abdullah, Yusuf b. Abdullah, Hüseyin b. Halil Kayıkçı, Dilaver b. Abdullah, Ali Beşe b. Abdullah Küçük Mehmed.