Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 303 Hüküm no: 272 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muammer bt. Abdullah ile kocası Ahmed b. Abdullah’ın muhâlaa yoluyla boşandıkları Mahmiye-i İstanbul’da Emekyemez Mahallesi’nde sâkine olup zâtını ma‘rifet-i şer‘iye ile ârifân el-Hâc Süleyman b. Mehmed ve Mehmed b. Mustafa nâm kimesneler ta‘rîfleriyle mu‘arrefe olan Muammer bt. Abdullah nâm hatun meclis-i şer‘de zevc-i muhâlı‘ı işbu râfi‘u’l-kitâb Ahmed b. Abdullah nâm kimesne mahzarında ikrâr ve takrîr-i kelâm edip mezbûr Ahmed zevcim olup zimmetinde mütekarrir ve ma‘kūdün-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzre zevcim mezbûr Ahmed ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyete müte‘allika âmme-i de‘âvîden her birimiz âharın zimmetini ibrâ ve ıskāt eyledik dedikde min-ba‘d hukūk-ı zevciyete müte‘allika birbirimiz ile vechen mine’l-vücûh da‘vâ ve nizâ‘ımız yokdur gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Şuhûdü’l-hâl: el-Hâc Süleyman b. Mehmed, Mehmed b. Mustafa, Mehmed Çelebi b. Haydar, Ahmed Çelebi b. Piyale ve gayruhum mine’l-huzzâr.