Bab Mahkemesi 54 Numaralı Sicil (H. 1102 / M. 1691) cilt: 20, sayfa: 336 Hüküm no: 403 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hasan’ın Havva bt. Hacı Seferoğlu’nun varisi olduğu ve hissesinin teslimi Mahmiye-i İstanbul’da Yenibahçe kurbunda Mi‘mâr Sinan mahallesinde sâkine iken bundan akdem vefât eden Havva bt. el-Hâc Sefer oğlu nâm sagīrenin üvey babası olan işbu bâ‘isü’l-kitâb Hasan Beşe b. Abdullah meclis-i şer‘-i şerîf-i enverde, sagīre-i mezbûrenin hayâtında ve li eb karındaşları Mehmed ve Ayşe nâm sagīrelerin dahi vasiyy-i mansûbları olmağla, babaları merkūm el-Hâc Sefer’den müntakil mâl-ı mevrûslarını vâzı‘u’l-yed olan el-Hâc Mahmud b. Mehmed mahzarında üzerine da‘vâ ve takrîr-i kelâm edip, sagīre-i mezbûre Havva bin yüz senesi Zilhiccesi’nin dokuzuncu gününde fevt oldukda, benim hâlâ menkûham olup benden hâmil olan vâlidesi işbu hâzır bi’l-meclis Müstakīm bt. Abdullah nâm hâtun ve li eb karındaşları mezbûrân Mehmed ve Ayşe’yi ve zevci Mehmed Çelebi b. Mustafa’yı terk edip, ba‘dehû sagīr-i mezbûr bin yüz bir Cemâziyelâhiresi’nin beşinci gününde doğup Ayşe ismi ile tesmiye olunup, kızım işbu mezbûre Ayşe ber vech-i muharrer mezbûre Havva’nın yevm-i mevtinde altı aydan beş gün ekallde tevellüd etmekle li üm karındaşı olup ve terekesinden altı sehimden bir sehim hisseye vârisesi müstahık olmağın, hâlâ vasiyy-i mezbûra suâl olunup terekesinden südüs hisse-i irsiyesini velâyetim hasebiyle bana teslîme tenbîh olunmak matlûbumdur dedikde, gıbbe’s-suâl vasiyy-i mezbûr cevâbında, müteveffât-ı mezbûre Havva’nın terekesine bi’l-vesâye vaz‘-ı yedini ikrâr, lâkin müdde‘î-i mezbûrun kızı mezbûre Ayşe altı aydan ekalde tevellüdünü ve ol vechile vârise olduğunu inkâr edicek, müdde‘î-i mezbûrdan sıdk-ı makāline muvâfık beyyine taleb olundukda, mahalle-i mezbûre sükkânından Berber Mehmed Çelebi b. Mustafa nâm kimesne ve Fâtıma bt. Ali ve Ayşe b. İlyas nâm hâtunlar li ecli’ş-şehâde meclis-i şer‘a hâzırân olup, istişhâd olunduklarında, fi’l-vâki‘ sagīre-i mezbûre Havva bt. el-Hâc Sefer oğlu bin yüz senesi Zilhiccesi’nin dokuzuncu gününde fevt oldukda mezbûr Hasan Beşe’nin hâlâ menkûhası olup, mezbûr Hasan Beşe’den hâmil olan vâlidesi işbu hâzıra bi’l-meclis Müstakīm bt. Abdullah ve li eb karındaşları mezbûrân Mehmed ve Ayşe’yi ve zevci Mehmed Çelebi b. Mustafa’yı terk edip, ba‘dehû haml-i mezbûr bin yüz bir senesi Cumâdelâhiresi’nin beşinci gününde doğup Ayşe ismi ile tesmiye olunan mezbûr Hasan Beşe’nin kızı, işbu mezbûre Ayşe ber vech-i muharrer mezbûre Havva’nın yevm-i mevtinden altı aydan beş gün ekalde tevellüd etmekle, li üm kız karındaşı olup ve terekesinden altı sehimden bir sehim hisseye vârise ve müstahıkkadır. Biz bu husûsa bu vech üzre şâhidleriz, şehâdet dahi ederiz deyu edâ-yı şehâdet-i şer‘iyye ettiklerinde, şâhidân-ı mezbûrân Mehmed Çelebi ve Fâtıma ve Ayşe kıbel-i şerî‘at-i garrâdan mahalle-i mersûme ahâlîsinden cem‘-i gafîr kimesnelerden keyfiyet-i hâlleri suâl olunmağın, mûcebiyle sagīre-i mezbûre Ayşe’nin ber vech-i mezkûr verâsetine ba‘de’l-hükmi’ş-şer‘î li üm kız karındaşı müteveffât-ı mezbûre Havva’dan isâbet eden südüs hisse-i irsiyesini velâyet hasebiyle babası müdde‘î-i mezbûr Hasan Beşe’ye def‘ ve teslîme vasiyy-i mezbûr el-Hâc Mahmud’a tenbîh olunup, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire sene 1102. Şuhûdü’l-hâl: Ahmed b. Mustafa, Mehmed b. Mahmud, Mehmed Beşe b. Mustafa, el-Hâc Hüseyin b. Mustafa el-mübâşir, el-Hâc Ömer b. Abdullah, Keçeci el-Hâc Mehmed b. Abdullah.