Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 336 Hüküm no: 306 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Efendi’nin varislerinin, merhumun kethudası ve vasîsi olan Osman Ağa b. Ali’de hiçbir alacakları kalmadığını beyan ettikleri Husûs-ı âti’l-beyânı tahrîr ve istimâ‘ için taraf-ı şer‘-i mutahhardan bi’t-taleb irsâl olunan Mevlânâ Ahmed Efendi işbu zeyl-i vesîkada isimleri mastûr olan Müslimîn ile Bağdad kādısı iken vedâ‘-ı âlem-i fânî edip verâseti zevce-i metrûkesi zahru’l-muhadderât Mahbûbe Hatun bt. Mehmed ile sulbî sagīr oğlu Süleyman ve sulbiye kebîre kızları Râbia ve Âmine nâm hatunlara münhasıra olan Hasan Efendi’nin mahmiye-i İstanbul’da merhûm ve mağfûrun-leh Sultân Mehmed Han -tâbe serâhu- hazretlerinin câmi‘-i şerîfi kurbünde vâki‘ menziline varıp akd-i meclis-i şer‘ eyledikde mezbûretân Râbia ve Âmine taraflarından ikrâr-ı âti’z-zikre vekîlleri olup mezbûretânın zâtlarını ma‘rifet-i şer‘iye ile ârifân olan eş-Şeyh Mehmed Efendi b. Ali ve Hüseyin b. Halil nâm kimesneler şehâdetleriyle vekâleti sâbite olan Ömer Ağa b. Ali ile merkūme Mahbûbe Hatun tarafından kezâlik ikrâra vekîl olup zâtını ma‘rifet-i şer‘iye ile ârifân olan Ataullah Efendi b. Osman ve Monla Hüseyin b. Halil nâm kimesneler şehâdetleri ile vekâleti sâbite olan mezbûre Mahbûbe’nin li-üm er karındaşı es-Seyyid Mehmed Efendi b. es-Seyyid Ali Efendi meclis-i ma‘kūdda müteveffâ-yı mezbûrun vasîyy-i muhtârı olan kethudâsı Osman Ağa b. Ali mahzarında her biri bi’l-vekâle takrîr-i kelâm edip mûrisimiz merkūm Hasan Efendi’nin hîn-i vefâtında şehr-i Bağdad’da yanında mevcûd olup defter-i kassâm nâtık olduğu üzre vasîyy-i mezbûrun makbûzu ve İstanbul’da mevcûd olan emti‘a ve sâir eşyâsından nakīr ve kıtmîr ve kalîl ve kesîr her ne makbûzu var ise yedinden bi’t-tamam ve’l-kemâl ahz ü kabz edip verâsete müte‘allika da‘vâdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm bizden asâleten ve vekâleten da‘vâ sudûr ederse lede’l-hükkâmi’l-kirâm mesmû‘a ve makbûle olmasın dediklerini mevlânâ-yı mezbûr mahâllinde tahrîr ve ma‘an irsâl olunan Mustafa Beşe ile alâ-vukū‘ihî meclis-i şer‘de inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Fahrü’l-mevâli’l-izâm Mehmed Efendi, Yusuf Efendi b. Rasûl, Mehmed Efendi b. İbrahim, Salih b. Mehmed tâbi‘-i Hasan Efendi, Receb Efendi b. Ebûbekir.