Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 335 Hüküm no: 305 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim b. Ali’nin evini kendi kurduğu para vakfının mütevelliyesi Ümmühani Hatun’a istiğlal yoluyla sattığı Mahmiye-i İstanbul’da Akşemseddin Mahallesi sükkânından Abdülkerim b. Ali nâm kimesne meclis-i şer‘-i şerîf-i enverde kendünün vücûh-ı hayrât için vakf eylediği nukūda hâlâ mütevelliye olan Ümmühani Hatun bt. ( ) tarafından husûs-ı âti’z-zikri tasdîka vekîl olup zât-ı mezbûreyi ma‘rifet-i şer‘iye ile ârifân olan Osman Efendi b. Ahmed ve Ali Efendi b. Ömer şehâdetleriyle şer‘an vekâleti sâbite olan Abd[ullah] Efendi b. eş-Şeyh Ahmed mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan el-Hâc İsa mülkü ve bir tarafdan mahalle-i mezbûre imâmına meşrûta vakıf menzil ve bir tarafdan Medîne-i Münevvere vakfı olan menzil ve bir tarafdan tarîk-ı âm ile mahdûd bir bâb mülk menzilimi bi-cümleti’t-tevâbi‘ ve’l-levâhık mezbûre Ümmühani Hatun’a altmış kıt‘a esedî guruşa bi-tarîkı’l-istiğlâl bey‘ ve teslîm edip ol dahi mal-ı vakf-ı mezbûr ile bi’t-tevliye iştirâ ve kabûl ve tesellüm eyledikden sonra semeni olan meblağ-ı merkūm altmış esedî guruşun otuz esedî guruşunu vakf-ı mezbûra hâlâ zimmetimde lâzımü’l-edâ deynim olan otuz esedî guruşa takās ol dahi mukāssa ve kabûl edip bâkī otuz esedî guruşu yedinden bi’t-tamam ve’l-kemâl ahz ü kabz edip yine mezbûre Ümmühani Hatun menzil-i mahdûd-ı mezkûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan beher senede yedişer buçuk esedî guruşdan üç sene tamamına değin yirmi iki buçuk esedî guruşa bana îcâr ve teslîm ben-dahi ber-vech-i muharrer istîcâr ve kabûl ve kabz eyledim dedikde gıbbe’t-tasdîkı’ş-şer‘î asl-ı mâl olan meblağ-ı mezbûr altmış esedî guruşun ancak otuz esedî guruşuna mahalle-i mezbûre sükkânından işbu hazır bi’l-meclis Sarrâc Yusuf Çelebi b. Ahmed emir ve kabûlü hâviye kefâlet-i sahîha-i şer‘iye ile kefîl olmağın mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Osman Efendi b. Ahmed, Ali Efendi b. Ömer, Ali Bey b. Mesîhî, Mehmed Çelebi b. Haydar, Ahmed Çelebi b. Piyale. [Beyaz]