Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 337 Hüküm no: 308 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed ile kocası Ali Beşe b. Mehmed’in muhâlaa yoluyla boşandıkları Mahmiye-i İstanbul’da Mehmed Ağa Câmi‘-i Şerîfi kurbünde Bakkālzâde odalarında sâkine Emine bt. Mehmed nâm hatun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Müezzin Receb Halîfe b. Ali ve İbrahim Beşe b. Hayrullah ve Sefer b. Mehmed nâm kimesneler şehâdetleri [ile] şer‘an sâbit olan Mehmed b. Süleyman nâm kimesne meclis-i şer‘-i hatîrde müvekkile-i mezbûrenin zevci işbu bâ‘isü’l-kitâb Ali Beşe b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Emine Hatun zevci mezbûr Ali Beşe zimmetinde mütekarrir ve ma‘kūdün-aleyh mehr-i müecceli olan iki bin akçenin iki yüz akçesini mezbûr Ali Beşe yedinden alıp kabz eylediğinden sonra bâkī kalan bin sekiz yüz akçe mehr-i müecceli üzerine ve nafaka-i iddet-i ma‘lûme ve meûnet-i süknâsı dahi kendi üzerine olmak üzre zevci mezbûr Ali Beşe ile muhâla‘a-i sahîha-i şer‘iye ile muhâla‘a olup ol dahi hul‘-ı mezbûru kabûl eylediğinden sonra her biri hukūk-ı zevciyete müte‘allika âmme-i de‘âvî ve mutâlebât ve eymân ve muhâsamâtdan âharın zimmetini ibrâ-yı âmm-ı kātı‘u’l-hisâm ile ibrâ ve ıskāt eylediler dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ömer Beşe b. Abdullah, Müezzin Mustafa b. Abdullah, Müezzin Ömer Çelebi b. ( ), Papuççu Ahmed, Çizmeci Mehmed.