Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 338 Hüküm no: 309 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Ali’nin, Ahmed b. Mehmed’e olan borcunun ikrar ettiği kısmını ödemesi Mahmiye-i İstanbul’da Tahtakale’de sâkin hasırcı tâifesinden işbu bâ‘isü’l-kitâb el-Hâc Ahmed b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde es-Seyyid Süleyman Çelebi b. es-Seyyid Ali nâm kimesne mahzarında üzerine da‘vâ ve takrîr-i kelâm edip mezbûr es-Seyyid Süleyman Çelebi bundan akdem yedimden iştirâ ve kabz eylediği beynimizde ma‘lûm mısır hasırı bahâsından işbu yedimde olan hüccet-i şer‘iye nâtıka olduğu üzre ba‘de-küllî hesâbin zimmetinde elli dört esedî guruş hakkım olmağla taleb eylediğimde bana edâ ve teslîmden imtinâ‘ eder suâl olunup meblağ-ı mezbûr elli dört guruşun mezbûr es-Seyyid Süleyman Çelebi’den alıverilmesi matlûbumdur dedikde gıbbe’s-suâl mezbûr es-Seyyid Süleyman Çelebi cevâbında müdde‘î-i mezbûra zimmetinde hasır bahâsından ba‘de-küllî hesâbin elli dört guruş deyni olduğunu ikrâr lâkin meblağ-ı mezbûrun yirmi dört guruşunu müdde‘î-i mezbûra bi’z-zât ma‘an edâ ve teslîm edip ancak müdde‘î-i mezbûra zimmetimde otuz guruş deynim vardır deyücek gıbbe’l-istintâk ve’l-inkâr merkūm es-Seyyid Süleyman Çelebi’den def‘-i mezbûruna beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrârı mertebesi olan meblağ-ı mezbûr otuz guruşu müdde‘î-i mezbûra edâ ve teslîme mezbûr es-Seyyid Süleyman Çelebi’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Seyyid İbrahim Çelebi b. el-Mübâşir, Mehmed Çelebi b. Haydar, Ahmed Çelebi b. Piyale, Mehmed Bey b. el-Muhzır, Ahmed Çelebi b. Haydar.