Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 354 Hüküm no: 326 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. İstemat’ın Balat kapısında bir uncu dükkânında bulunan eşyalarının dörtte bir hissesini Yorgo v. Yani’ye sattığı Mahmiye-i İstanbul’da Balat kapısı dâhilinde sâkin Dimitri v. İstemat nâm zimmî meclis-i şer‘-i şerîf-i enverde işbu râfi‘u’l-vesîka Yorgo v. Yani nâm zimmî muvâcehesinde ikrâr-ı tâm ve takrîr-i kelâm edip sâbıkā Rumeli Kādıaskeri olan fazîletlü eş-Şeyh Mehmed el-İzzetî Efendi hazretlerinin taht-ı tasarrufunda olup zikri mürûr eden Balat kapısı dâhilinde vâki‘ lede’l-ahâlî ve’l-cîrân ma‘lûmü’l-hudûd bir bâb uncu dükkânında mevcûd silk-i mülkümde münselik olan bir değirmen taşı ve bir çarh ve bir ahır binâsı ve dokuz bargir ve on beş çuval ve bir kantar ve on beş elek ve iki terâzi ma‘a vukıyye ve bir tencere ve bir sahan ve bir tâbemin dört sehimden bir sehmini mezbûr Yorgo’ya yüz on esedî guruşa bey‘-ı bâtt-ı sahîh-i şer‘î ile bey‘ ve temlîk ve teslîm ol dahi ber-vech-i muharrer iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz on esedî guruşu mezbûr Yorgo yedinden tamamen alıp kabz eyledim fîmâ-ba‘d eşyâ-i mezkûrenin dört sehimden bir sehmi mezbûr Yorgo’nun mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevm fî-gurreti şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Ahmed Çelebi b. Mustafa, Ahmed Beşe b. Ahmed, Mehmed Çelebi b. Eyüb, el-Hâc Üveys b. Mehmed, Ahmed Beşe b. Abdülkerim, Mehmed Beşe b. Hüseyin, Şahin b. Abdullah, İbrahim Beşe b. Ramazan, Nikola v. İstati, Nikola v. İsbilyon, Panayot v. Anderice.