Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 353 Hüküm no: 325 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Lefter v. Yorvad’ın vârislerinin, mûrislerini öldürdüğü iddiasıyla Ömer Ağa b. Derviş’e açtıkları davada onunla sulh oldukları Vilâyet-i Anadolu’da Gümüşhâne kasabası mahallâtından Hızır İlyas Mahallesi’nde sâkin iken bundan akdem hâlik olan Lakar [Lefter] v. Yorvad nâm zimmînin verâseti zevce-i menkûhası [Di]krane bt. Yani ile sulbî kebîr oğulları Kerki ve İstefan ve Yamandi ve Anaştas’a ve sulbiye kebîre kızı Anadoli’ye münhasıra olduğu şer‘an zâhir ve müte‘ayyin oldukdan sonra [Defterde bu hükmün devamı 85a’dadır.] [85a] mezbûrân İstefan ve Yamandi asâleten ve merkūm Kerki kendi tarafından asâleten ve mezbûrûn Dikrane ve Anaştas ve Anadoli taraflarından zikri âtî da‘vâya ve sulh ve ibrâya vekîl olup Bayburd ahâlîsinden Musa Bey b. İvaz ve Yusuf Bey b. Abdullah şehâdetleriyle şer‘an vekâleti sâbite ve sübût-ı vekâletine hükm-i hâkimü’ş-şer‘ lâhık oldukdan sonra vekâleten meclis-i şer‘-i şerîf-i lâzımü’t-tevkīrde işbu bin doksan bir senesinde Gümüşhâne emîni olan bâ‘isü hâze’l-kitâb Ömer Ağa b. Derviş tarafından ikrâr-ı âti’z-zikri tasdîka vekîl olup bimâ-hüve nehcü’s-sübût şer‘an vekâleti sâbite olan Mustafa Ağa b. Ali mahzarında her biri ikrâr-ı tâm ve takrîr-i kelâm edip mûrisimiz mezbûr Lefter zikrolunan Gümüşhâne’de veznedâr olmağla müvekkil-i mezbûr Ömer Ağa debbûs ile bi-gayr-ı vechin mezkûr[un] arkasına darb edip ve andan nâşî mezbûr Lefter hâlik olmağla husûs-ı mezbûru merkūm Ömer Ağa’dan da‘vâ eylediğimizde bi’l-külliye inkâr edip beynimizde nizâ‘-ı küllî vâki‘ olmuşidi el-hâletü hâzihî muslihûn tavassut edip da‘vâ-yı mezkûrumuzdan beynimizde iki yüz esedî guruş üzerine akd-i musâlaha olundukda biz dahi asâleten ve vekâleten sulh-i mezbûru kabûl ve bedel-i sulh olan meblağ-ı mezbûr iki yüz esedî guruşu vekîl-i mezbûr yedinden alıp kabz edip hâlik-i mezbûrun dem ve diyetine müte‘allika âmme-i de‘âvî ve muhâsamât ve eymân ve mutâlebâtdan merkūm Ömer Ağa’yı ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm merkūm Ömer Ağa ile bi-vechin mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Rebî‘i’l-âhir li-sene ihdâ ve tis‘în ve elf. Şuhûdü’l-hâl: Osman Ağa b. Ahmed Ağa, Mehmed Ağa b. Süleyman, el-Hâc İsa Ağa b. Cafer, Ömer Çelebi b. Hüseyin, Eyüb Ağa b. Mehmed, el-Hâc Davud b. Nuh, Mustafa Bey b. Yusuf.