Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 355 Hüküm no: 328 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Kostantin’in, koyunlarına el koyduğu iddiasıyla eski Mora valisi Hasan Paşa’ya açtığı davada onunla sulh olduğu Fi’l-asl Vilâyet-i Rumeli’nde Mora Sancağı’nda Trapoliçe kazâsına tâbi‘ Kamaniçe nâm karye ahâlîsinden olup hâlâ mahmiye-i İstanbul’da Atpazarı kurbünde bi-tarîkı’l-müsâfere sâkin Nikola v. Kostantin nâm zimmî meclis-i şer‘-i şerîf-i enverde târih-i kitâbdan altı sene mukaddem Mora vâlîsi olan râfi‘u hâze’l-kitâb rif‘atlü Hasan Paşa mahzarında ikrâr-ı tâm ve takrîr-i kelâm edip müşârün-ileyh Hasan Paşa târih-i mezkûrda Mora vâlîsi iken beni ahz ve bi-gayr-ı hakkın yedi yüz elli re’s koyunumu cebren ahz ü kabz etmekle mârrü’z-zikr koyunların a‘yânı mevcûde ise a‘yânını değil ise ba‘de’s-sübût kıymet-i şer‘iyelerini müşârün-ileyhden taleb ve da‘vâ eylediğimde onlar dahi bi’l-külliye inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezkûremden müşârün-ileyh Hasan Paşa ile beni an-inkârin yirmi esedî guruş ile yüz re’s koyun üzerine inşâ-i akd-i sulh eylediklerinde ben-dahi sulh-i mezbûru kabûl ve bedel-i sulh olan meblağ-ı mezbûr yirmi esedî guruş ile mârrü’z-zikr yüz re’s koyunları müşârün-ileyh Hasan Paşa yedinden alıp kabz edip ziyâdeye müte‘allika âmme-i da‘vâdan müşârün-ileyhin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min-ba‘d mârrü’z-zikr koyunlara müte‘allika müşârün-ileyh ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurre-i şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Ağa b. Mehmed el-Mübâşir, el-Hâc Mustafa Çelebi b. Galatavî, el-Hâc İsmail b. ( ), Mehmed Çelebi b. Haydar, Ahmed Çelebi b. Piyale.