Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 356 Hüküm no: 329 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot ile vasîsi Apostol v. Papadimo’nun alacak davasında sulh oldukları Vilâyet-i Rumeli’nde medîne-i Yenişehir’e tâbi‘ Fener nâhiyesinde Bezinle? nâm karye sükkânından iken bundan akdem hâlik olan Celeb Yani v. Panayot nâm zimmînin verâseti sulbî kebîr oğlu Panayot’a münhasıra olduğu şer‘an zâhir ve müte‘ayyin oldukdan sonra mezbûr Panayot meclis-i şer‘-i hatîr-i enverde işbu râfi‘u’l-vesîka Apostol v. Papadimo nâm zimmî tarafından ikrâr-ı âti’z-zikri tasdîka vekîl olup Hristo v. Panayot ve Todori v. Yani şehâdetleriyle şer‘an vekâleti sâbite olan karındaşı Anderya v. Papadimo muvâcehesinde bi’t-tav‘i’s-sâf ikrâr-ı tâm ve takrîr-i kelâm edip babam mezbûr Yani hâlik oldukda ben sagīr bulunup tesviye-i umûruma mezkûr Apostol kıbel-i şer‘den mansûb vasîm olmağla hâlik-i mezbûrdan bana intikāl eden mahmiye-i İstanbul’da Kumkapı’da vâki‘ nısf dükkân ve Yenikapı’da vâki‘ bir bâb dükkânın rub‘u ve Ahır Meyhânesi ta‘bîr olunur meyhânede rub‘ hisse ve seksen bin nakid akçe ve sâir eşyâ-i ma‘lûmeyi bi’l-vesâye kabz ve istihlâk etdikden sonra ben kebîr olup umûrumu vasîsi görmekden müstağnî olduğumdan sonra bana ancak otuz altı bin akçe teslîm ben-dahi tesellüm ve kabz edip ziyâdeyi teslîmden imtinâ‘ etmekle beynimizde münâza‘ât-ı kesîre cereyân etmişidi el-hâletü hâzihî muslihûn tavassut edip da‘vâ-yı mezkûremden mezbûr Apostol ile beynimizde otuz bin akçe üzerine akd-i musâlaha olundukda ben-dahi sulh-i mezbûru kabûl ve bedel-i sulh olan meblağ-ı mezbûr otuz bin akçeyi yedinden alıp kabz edip ziyâdeye ve husûs-ı mezbûra müte‘allika âmme-i de‘âvî ve muhâsamât ve eymân ve mutâlebâtdan mezbûr Apostol’u ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm her birimizin âhar ile bi-vechin mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mübâşir es-Seyyid Ahmed Çavuş b. Mehmed, Mehmed Bey b. Abdullah Kethudâ, Mehmed Çelebi b. Haydar, Ahmed Çelebi b. Piyale, Mahmud Çelebi b. ( ) el-mukayyid, İbrahim Çelebi b. Mustafa, Todoş v. Nikola, Anderya v. Papadimo, Harşid v. Yani, Dimo v. Yani, Aleksan v. Vakosti.