Bab Mahkemesi 54 Numaralı Sicil (H. 1102 / M. 1691) cilt: 20, sayfa: 339 Hüküm no: 407 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mehmed’in üzerine çocukları ve eski karısı için nafaka takdiri Mahmiye-i İstanbul’da Debbâğ Yunus mahallesi sâkinelerinden bâ‘isü hâze’l-kitâb Ayşe bt. Mehmed nâm hâtun meclis-i şer‘-i şerîf-i enverde takrîr-i kelâm ve bast-ı merâm edip, zevc-i mutallıkım Mehmed Çelebi b. Mehmed nâm kimesnenin firâşından hâsıla ve benden mütevellide işbu sagīre sadriye kızım Ümmühâni’nin nafaka ve kisvesi için ve merkūm Mehmed Çelebi’den hâlâ hamlim olmağla vaz‘-ı haml edinceye değin benim nafakam için babaları mezbûr Mehmed Çelebi üzerine kıbel-i şer‘-i hatîrden kadr-i ma‘rûf nafaka ve kisve-bahâ farz ve takdîr olunmak matlûbumdur dedikde, husûs-ı mezbûr sikāt ihbârlarıyla mütehakkik olmağla, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri sagīre-i mezbûrenin nafaka ve kisvesi için beher yevm altışar akçe ve merkūmenin nafakası için dahi kezâlik külle yevm altışar akçe ki, cem‘an on iki akçe farz ve takdîr ettiğinden sonra meblağeyn-i mezbûreyn vech-i meşrûh üsere sagīre-i mezbûrenin ve hasran kendinin kisve ve sâir levâzım-ı zarûriyyesi için harc ve sarfa ve lede’z-zarûre istidâneye ve lede’z-zafer merkūm Mehmed Çelebi üzerine rücû‘a mezbûre Ayşe Hâtun’a izin vermeğin, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire sene 1102. Şuhûdü’l-hâl: Süleyman Ağa b. Halil, Süleyman Efendi el-müezzin, Ali Efendi b. Mustafa, Ahmed Çelebi b. Mehmed, Halil Çelebi. b. Receb, Halil Beşe b. Receb, Edhem Efendi b. Şaban, Yahya Çelebi b. Şaban, es-Seyyid Abdullah Çelebi b. Mehmed.