Bab Mahkemesi 54 Numaralı Sicil (H. 1102 / M. 1691) cilt: 20, sayfa: 339 Hüküm no: 408 Orijinal metin no: [71a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Ağa b. Oruç’un varislerin birbirlerinin zimmetlerini ibra etmesi Samsoncubaşı olup mahmiye-i İstanbul’da Suhte Sinan mahallesinde sâkin iken bundan akdem vefât eden Sefer Ağa b. Oruç’un verâseti, sulbî kebîr oğlu Hasan Ağa ve kebîre kızı Fâtıma nâm hâtuna ve sagīr oğlu Mehmed’e münhasıra olduğu şer‘an zâ[hir] ve müte‘ayyin oldukdan sonra mezbûr Hasan Ağa meclis-i şer‘-i şerîf-i enverde, işbu bâ‘isü’l-kitâb el-Hâc Ali b. Ahmed mahzarında ikrâr-ı tâm ve takrîr-i kelâm edip, babam mezbûr Sefer Ağa’nın emlâkinden vilâyet-i Rumeli’nde Babadağı kazâsına [tâbi‘] Cantay nâm karyede vâki‘ mülkü çiftliğini bin beş yüz guruşa iştirâ eden sâbıkan İbrâil Nâzırı Süleyman Ağa semen-i mezbûru kable’l-edâ fevt olmağla, ben asâleten ve sâir verese tarafından vekîl olan mezbûr el-Hâc Ali vekâleten Babadağı’na varıp, veresesinden meblağ-ı mezbûru da‘vâya tesaddî ve taraf-ı Devlet-i aliyye’den mütevellî ve mübâşir ta‘yîn ve bi’d-defa‘ât murâfa‘a ve nice eyyâm meksden sonra yine karye-i mezbûrede vâki‘ iki göz değirmen ile bâkī sekiz yüz elli guruş tahsîl ve kabz olunmuşidi. Lâkin meblağ-ı mezbûrun altı yüz elli guruşu ücret-i mübâşir ve resm ve harc-ı râh ve bi’l-cümle benim kendi yedimle mesârif-i lâzımemize sarf olunup, mârru’z-zikr değirmen ile bâkī iki yüz guruşu kabz ve meblağ-ı mezbûr ile zikr olunan değirmen dahi bey‘ olunmakla semeni kabz [ve] verese beynlerinde iktisâm olunup ve meblağ-ı mezbûr benim yedimle sarf olunmakla, mezbûr el-Hâc Ali ile bi vech-i mine’l-vücûh da‘vâ ve nizâ‘ım olmayıp, husûs-ı mezbûra müte‘allika da‘vâdan mezbûru ibrâ ve iskāt eyledim dedikde, merkūm Fâtıma tarafından dahi husûs-ı âti’l-beyâna vekîl olup, zât-ı mezbûreyi ma‘rifet-i şer‘iyye ile ârifân olan İbrahim Çelebi b. Ahmed ve Mustafa b. Mehmed şehâdetleriyle şer‘an vekâleti sâbite olan Mehmed Çelebi b. Ömer meclis-i şer‘de merkūm el-Hâc Ali mahzarında bi’l-vekâle ikrâr ve i‘tirâf edip, hâl bâlâda şerh ve beyân olunan minvâl üzre olduğu müvekkilem mezbûre Fâtıma’nın dahi ma‘lûmu [olup], ol dahi merkūm Hasan Ağa yediyle sarf olunan meblağ-ı mezbûr altı yüz elli guruşa müte‘allika âmme-i da‘vâdan mezbûr el-Hâc Ali’yi ibrâ ve kātı‘ü’n-nizâ‘la ibrâ ve iskāt eyledi, onun dahi mezbûr ile da‘vâ ve nizâ‘-ı kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire sene 1102. Şuhûdü’l-hâl: El-Hâc Mahmud b. Ahmed, Ahmed Beşe b. Yakub, İbrahim Beşe b. Ahmed, es-Seyyid Yahya Çelebi b. Mehmed, Halil Çelebi b. Ahmed, Ömer Efendi b. ( ), Hasan Çelebi [b.] Şaban.