Bab Mahkemesi 54 Numaralı Sicil (H. 1102 / M. 1691) cilt: 20, sayfa: 341 Hüküm no: 410 Orijinal metin no: [71a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Ahmed’in İsmail Ağa b. Mehmed’den muhâlaa yoluyla boşanması Mahmiye-i İstanbul’da Haydarhâne mahallesinde sâkine Havva bt. Ahmed nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enver ve mahfil-i dîn-i münîf-i ezherde, zevci işbu sâhibü’l-kitâb İsmail Ağa b. Mehmed mahzarında bi tav‘ihâ ikrâr ve i‘tirâf edip, zevcim mezbûr İsmail Ağa ile hüsn-i zindegânimiz olmamağla, zimmetinde mütekarrir ve ma‘kūdun-aleyh olan yüz kıt‘a esedî guruş mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim merkūm İsmail Ağa ile muhâla‘a-i sahîha-i şer‘iyye ile muhâla‘a edip, ol dahi minvâl-i muharrer üzre hul‘-ı mezbûru kabûl eyleyip, ba‘de’l-yevm hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve iskāt eyleyip, bir birimiz ile kat‘â da‘vâ ve nizâ‘ımız kalmadı dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire sene 1102. Şuhûdü’l-hâl: Es-Seyyid Şeyh Hüseyin Efendi [b.] es-Seyyid Mehmed, el-Hâc Halil Efendi el-imâm, Ebûbekir Efendi b. Ahmed, Hızır Beşe b. Hüseyin, Sarrâc Seyyid Mustafa Çelebi, Ahmed Beşe b. İbrahim, Abdülkādir Beşe b. Ahmed.