Bab Mahkemesi 54 Numaralı Sicil (H. 1102 / M. 1691) cilt: 20, sayfa: 340 Hüküm no: 409 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali ile Ümmühâni Hatun bt. Ahmed ve kızının çeşitli emtia satışından hasıl olan alacak davasında birbirlerinin zimmetini ibra etmesi Mahmiye-i İstanbul’da Tahta Hanı’nda sâkin Mehmed b. Ali nâm kimesne meclis-i şer‘-i şerîf-i enverde, mahmiye-i mezbûrede Kilise Câmi‘i kurbunda Ali Paşa-yı Atîk mahallesi sâkinelerinden Ümmühâni Hâtun bt. Ahmed ve sadriye kebîre kızı Rukiye bt. Mahmud nâm hâtunlar mahzarında ikrâr-ı tâm ve takrîr-i kelâm edip, bundan akdem mezbûre Ümmühâni, bana birkaç top sandal getür iştirâ edeyim demekle, ben dahi mecmû‘u yüz yedi guruş kıymetli altı top sandal ve altı çatkı ve bir top hammâmî dülbend ve iki top bogasi ve iki değirmi dülbendimi bir boğça içine vaz‘ ve mezbûre Ümmühâni’nin menzili kapısında kızı mezbûre Rukiye’ye def‘ ve teslîm ettim deyu mezbûretândan taleb ve da‘vâ eylediğimde, mezbûretân dahi husûs-ı mezkûru bi’l-külliye münkir olmalarıyla, beynimizde ba‘de’n-nizâ‘ muslihûn tavassut edip, da‘vâ-yı mezkûremden beni mezbûretân Ümmühâni ve Rukiye ile üç bin akçe üzerine sulh olduklarında, ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçeyi mezbûretân yedlerinden bi tamâm ahz u kabz eyledikden sonra husûs-ı mezbûre müte‘allika da‘vâ ve mütâlebâtdan mezbûretânın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim. Ba‘de’l-yevm mezbûretân ile kat‘â da‘vâ ve nizâ‘ım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire ve mi’e ve elf. Şuhûdü’l-hâl: Ahmed Çavuş b. Abdülkerim el-mübâşir, el-Hâc Mehmed Çavuş, Abdullah Çelebi b. Mehmed, Mustafa Bey b. Mehmed, Halil b. Mehmed, İbrahim Çelebi b. Ahmed, Mehmed Çelebi b. Hüseyin.