Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 385 Hüküm no: 363 Orijinal metin no: [79b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Armago’nun Andon v. Toma’yı vekil tayin ettiği Medîne-i Ebî Eyyûbi’l-Ensârî’de Bostan İskelesi kurbünde sâkin Dimo v. Armago nâm zimmî meclis-i şer‘-i şerîf-i enverde işbu râfi‘u’l-vesîka Andon v. Toma nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikule kapısı hâricinde sâkin mumcu tâifesinden gāib ani’l-meclis Apostol v. Yorgi nâm zimmî zimmetinde beynimizde ma‘lûm şem‘hâne icâresinden on bin akçe hakkım olup meblağ-ı mezbûr on bin akçeyi merkūm Apostol’dan taleb ve da‘vâ ve ahz ü kabza ve bana îsâle ve ahz ü kabz ve îsâl mütevakkıf olduğu umûrun küllîsine tarafımdan mezbûr Andon’u vekîl ve nâib-i menâb nasb ve ta‘yîn eyledim dedikde mezbûr Andon dahi vekâlet-i mezbûreyi kabûl ve merâsimini edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: es-Sâbıkūn.