Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 71 Hüküm no: 19 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Gülistan’ın müdebber cariyesi Gülbuy Hanım’ın alacak davasında sulh olması Sah. Mahmiye-i İstanbul’da Ali Fakıh mahâllesinde sâkine iken bundan akdem fevt olan Gülistan bt. Abdullah nâm hatunun hayâtında yedinde câriye-i memlûkesi olup tedbîr-i mutlak ile müdebbere eylediği vech-i şer‘î üzere sâbit olan Gülbuy nâm hatun mahmiye-i mezbûrede meclis-i şer‘de müteveffât-ı mezbûrenin zâhirde zevc-i metrûku Süleyman b. Abdullah nâm kimesneden gayrı vârisi olmayıp terekesinin nısfı mezbûr Süleyman’a ve nısf-ı âharı cânib-i beytülmala âid olduğu şer‘an zâhir oldukdan sonra işbu râfi‘ü’l-vesîka mezbûr Süleyman mahzarında ikrâr ve takrîr-i kelâm edip müteveffât-ı mezbûre beni hayâtında tedbîr-i mutlak ile müdebbere eylediğinden sonra beynimizde ma‘lûm ba‘zı eşyâ bana vasiyet etmekle ben dahi ber-mûceb-i vasiyet eşyâ-yı mezkûreyi terekesine vâzı‘ü’l-yed olan mezbûr Süleyman’dan taleb ve da‘vâ sadedinde olduğumda mezbûr Süleyman dahi bana malından şer‘an on guruş def‘ ü teslîm ben dahi yedinden ahz u kabz eylediğimden sonra husûs-ı mezbûra müte‘allıka âmme-i da‘vâdan mezbûr Süleyman’ın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Es-Seyyid Salih b. Mehmed, Abdi b. Receb, Ömer b. Dilaver, Ali b. Receb, Mehmed b. İbrahim, Mehmed b. Yusuf, Mehmed Çavuş mübâşir.