Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 70 Hüküm no: 18 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Eflak taifesinden Mano’nun alacak davasının sulh yoluyla neticelenmesi
Eflak tâifesinden olup mahrûse-i Galata’da Karaki kapısında müsâfiren sâkin Mano v. Yani nâm zimmî mahmiye-i İstanbul’da meclis-i şer‘-i hatîrde Eflak boyarlarından işbu bâ‘isü’s-sifr Panaborni? v. Barbo tarafdan husûs-ı âti’l-beyana vekîl olduğu Yanaki v. Manol ve Astoryo v. Barbo nâm zimmîler şehâdetleri ile sâbit olan Apostol v. Tanaş nâm zimmî muvâcehesinde ikrâr ve takrîr-i kelâm edip müvekkil-i mezbûr Panaborni târîh-i kitâbdan iki sene mukaddem vilâyet-i Eflak’da Karbuda? nâm kasabada sâkin olduğum odamı basıp malımdan nakid dört yüz guruş ve kırk Macar altını ve altmış guruş kıymetli on beş zirâ‘ moher çuka ve yirmi dört guruş kıymetli sekiz zirâ‘ Londra çuka ve elli guruş kıymetli iki re’s atımı ahz u kabz etmiş idi deyü meblağayn-i mezbûreyn ile zikr olunan çukaların kıymetlerini müvekkil-i mezbûrdan da‘vâ ve taleb sadedinde olduğumda ol dahi husûs-ı mezbûru bi’l-külliye inkâr edip ben dahi isbât murâd eylediğimde beynimizde münâza‘ât-ı kesîre vâkı‘a olmuş idi. El-hâletü hâzihi beynimize muslihûn tavassut edip da‘vâ-i mezkûremden beni an-inkâr otuz beş guruş üzerine sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz beş guruşu işbu meclis-i şer‘de vekîl-i mezbûr yedinden tamâmen ahz u kabz edip husûs-ı mezbûra müte‘allıka âmme-i de‘âvî ve kâffe-i mutâlebâtdan müvekkil-i mezbûr Panborni’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu.
Fi’l-yevmi’s-sânî aşer min-Muharremü’l-haram li-sene sitte aşere ve mi’e ve elf.
Şuhûdü’l-hâl: Sefer Çavuş el-mübâşir, Çadırcı Halil Çelebi b. Ali, Ali Rıfâtî b. Mustafa, Mehmed Efendi b. Hüseyin, el-Hâc Yusuf b. Osman, Dimitriyaki kapıkethüdâsı, Virgeli? kapıkethüdâsı, Mihal ve Poliharyo Markalak?
|