Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 72 Hüküm no: 21 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. At hamallarından Osman’ın kaybolan ve Yusuf’un elinde olan atının kendisine teslimi Mahmiye-i İstanbul’da Unkapanı kapısı hâricinde at hamallarından bâ‘isü’l-kitâb Osman b. Ahmed nâm kimesne mahmiye-i mezbûrede meclis-i şer‘-i hatîrde zikri âtî bargire vâzı‘ü’l-yed olan Yusuf b. Ali nâm kimesne mahzarında üzerine da‘vâ ve takrîr-i kelâm edip işbu meclis-i şer‘de mevcûd ve müşâhede olan çil iğdiç bargir mülküm olup târîh-i kitâbdan dört sene mukaddem mülkümden zâyi olmuş idi. Hâlâ mezbûr Yusuf’un yedinde bulup taleb eylediğimde bana teslîmden imtinâ‘ eder suâl olunup bi’l-istihkāk alıverilmek matlûbumdur dedikde, gıbbe’s-suâl mezbûr Yusuf cevâbında zikr olunan bargiri târîh-i kitâbdan beş gün mukaddem ismi ma‘lûmum olmayan bir Arnavud’dan altı guruş ve üç rub‘ semen-i medfû‘a iştirâ etdim, ol vechile vaz‘-ı yed ederim deyip müdde‘î-i mezbûrun mülkü olduğunu inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden ve yine hamal tâifesinden Mahmud b. Mehmed ve Musa b. Mehmed nâm kimesneler li-ecli’ş-şehâde meclis-i şer‘e hâzırân olup istişhâd olundukda fi’l-hakīka işbu meclis-i şer‘de mevcûd ve müşâhede olunan çil iğdiç bargir müdde‘î-i mezbûr Osman’ın mülkü olup târîh-i kitâbdan dört sene mukaddem mülkünden zâyi‘ eyledi, müdde‘î-i mezbûr için sâlifü’z-zikr bargiri mezbûr Yusuf’dan bi’l-istihkāk hakk-ı taleb ve ahz vardır. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın müdde‘î-i mezbûr Osman tahlîf-i şer‘î ile tahlîf olunup mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 12 min-Muharremü’l-haram sene 1116. Şuhûdü’l-hâl: Mehmed Efendi [b.] Ahmed, Ömer Efendi b. Ali, İsmail Efendi b. Siyavuş, el-Hâc Yusuf b. Osman.