Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 73 Hüküm no: 22 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şaban’ın Çukurbostan mahallesindeki menzil hissesini Emine bt. Mehmed’e satması Mahmiye-i İstanbul’da <> Sultân Selim Câmi‘-i şerîfi kurbünde Çukurbostan mahâllesi sükkânından Mehmed Şaban nâm kimesne mahmiye-i mezbûrede meclis-i şer‘-i hatîrde işbu bâ‘isetü’l-vesîka Emine bt. Mehmed nâm hatun tarafından husûs-ı âti’l-beyanı tasdîka vekîl olduğu zât-ı mezbûreyi ma‘rifet-i şer‘iyye ile ârifân İsmail Efendi b. Abdülkerim ve Mehmed Beşe b. Bayram nâm kimesneler şehâdetleriyle sâbit olan Mehmed Çelebi b. Hüseyin nâm kimesne mahzarında ikrâr ve takrîr-i kelâm edip mahâlle-i mezbûrede vâki‘ bir tarafdan Yusuf Beşe b. Abdullah mülkü ve iki tarafdan Emine Hatun mülkü ve bir tarafdan ba‘zan mahâlle-i mezbûre imamına meşrûta vakıf menzil ve bir tarafdan tarîk-i hâs ile mahdûd olup fevkānî iki bâb oda ve tahtânî iki bâb oda ve bir sofa ve bi’r-i mâ ve kenîfi ve havluyu ve sokak kapısını müştemil olan arsasının Sivaslı Efendi tekyesi vakfına senede yirmi akçe mukāta‘ası ve binâsı mülk olan menzilin nısf-ı şâyi‘i müvekkile-i mezbûre Emine Hatun’un mülkü ve nısf-ı âharı dahi benim mülküm olmağla ben menzil-i mezbûrda olan nısf hisse-i şâyi‘amı müvekkile-i mezbûre Emine Hatun’a tarafeynden îcâb ve kabûlü hâvî bey‘-i kat‘î ile kırk guruşa bey‘ ve teslîm ol dahi minvâl-i muharrer üzere iştirâ ve tesellüm ve kabûl eylediğinden sonra semeni olan meblağ-ı mezbûr kırk guruşu müvekkile-i mezbûre Emine Hatun yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun nısfında benim alâkam kalmayıp cümlesi müvekkile-i mezbûre Emine Hatun’un mülkü ve hakkı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Abdullah Efendi el-imâm, Halil Çelebi b. Ahmed, Mehmed Çelebi b. Ali, el-Hâc Mustafa b. Musa, Molla Hasan b. ( ), Receb b. Bayram.