Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 190 Hüküm no: 130 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Hüseyin’in kölesi Yusuf’un hür olduğunu ispat ettiğinden serbest bırakılması İşbu orta boylu şaşı gözlü esmerü’l-levn râfi‘ü’l-vesîka Yusuf nâm şâbbü’l-emred mahmiye-i İstanbul’da meclis-i şer‘de rıkk olmak üzere kendüye vâzı‘ü’l-yed olan Receb b. Hüseyin nâm kimesne mahzarında üzerine da‘vâ ve takrîr-i kelâm edip ben medîne-i Sofya’da Vildan mahâllesinde sâkin Hasan b. Abdullah nâm kimesnenin firâşından hâsıl ve zevcesi Fâtıma bt. Abdurrahman nâm hatundan mütevellid olup sulbî oğlu olmağla hürrü’l-asl olup ebeveynime kat‘â rıkk târî olmuş değil iken mezbûr Receb bana rıkk olmak üzere bi-gayrı hakkın vaz‘-ı yed eder, suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr Receb cevâbında mevsûf-ı mezbûru târîh-i kitâbdan üç ay mukaddem gāib ani’l-meclis Tekfurdağlı Mustafa nâm kimesneden seksen iki guruş semen-i medfû‘a iştirâ etmekle yedimde mülküm olmak üzere vaz‘-ı yed ederim deyü ber-vech-i muharrer mevsûf-ı mezbûr Yusuf’un hürriyetini inkâr edicek [mev]sûf-ı mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup medîne-i mezbûrede imâret mahâllesi ahâlîsinden Nalçacı Derviş b. Abdünnebi ve Mehmed b. Osman nâm kimesneler li-ecli’ş-şehâde meclis-i şer‘e hâzırân olup istişhâd olundukda fi’l-hakīka mevsûf-ı mezbûr Yusuf zikr olunan Vildan mahâllesinde sâkin merkūm [40a] Hasan b. Abdullah’ın sulbî oğlu olup hürrü’l-asıldır ebeveynine kat‘â rıkk târî olmuş değildir, biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mevsûf-ı mezbûr Yusuf’un hürriyetine ba‘de’l-hükm mezbûr Receb’in kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Mehmed Efendi b. Hasan, Yusuf Beşe b. Abdullah, Ali b. Abdullah, el-Hâc Mehmed b. Musa, Hüseyin b. Mehmed.