Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 196 Hüküm no: 137 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Beşe’nin kendisine haksızlık eden İstarava Serdarı Mehmed Beşe’den alacağını tahsil etmesi <> Vilâyet-i Rumeli’nde İstarova kazâsına tâbi‘ Alarob nâm karyeden Dergâh-ı âlî yeniçerilerinden bâ‘isü’l-kitâb Selim Beşe b. Hasan nâm kimesne mahmiye-i İstanbul’da meclis-i şer‘de sâbıkā İstarova serdârı olan Mehmed Beşe b. Ali nâm kimesne mahzarında üzerine da‘vâ ve takrîr-i kelâm edip târîh-i kitâbdan üç sene mukaddem mezbûr Mehmed Beşe kazâmızda serdâr olup karyenizde kan olmuş deyü beni ahz u habsedip cerîme nâmıyla bi-gayrı hakkın on beş guruşluk para ile on beş bütün guruşumu ve her biri yarımşar guruş kıymetli yirmi koyun ve on keçi ahz ve kabz etmişdir, suâl olunsun dedikde gıbbe’s-suâl mezbûr Mehmed Beşe cevâbında müdde‘î-i mezbûrdan ancak on guruş kabzını ikrâr ziyâde yirmi guruş ile sâlifü’z-zikr koyun ve keçiyi ahz u kabz eylediğini inkâr edicek müdde‘î-i mezbûr Selim Beşe’den ziyâde müdde‘âsına beyine taleb olundukda udûl-i Müslimînden ve İstarova kazâsı ahâlîsinden ve tâife-i mezbûreden Hasan Beşe b. Mehmed ve zikr olunan Alarob karyesinden Mehmed Beşe b. Hasan nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka târîh-i kitâbdan üç sene mukaddem mezbûr Mehmed Beşe İstarova kazâsı serdârı olup karyenizde kan olmuş deyü müdde‘î-i mezbûr Selim Beşe’yi ahz u habsedip cerîme nâmıyla bi-gayrı hakkın on beş guruşluk para ve on beş bütün guruşunu ve her biri yarımşar guruş kıymetli yirmi koyun ve on keçisini bizim huzûrumuzda ahz u kabz eylediğini müdde‘î-i mezbûr Selim Beşe bâlâda zikr olunduğu üzere otuz guruşu ve sâlifü’l-beyan koyun ve keçilerin kıymet-i şer‘iyyesinden müctemi‘ olan on beş guruşu işbu Serdâr-ı merkūm Mehmed Beşe’den hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’l-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. >> <> <<Şuhûdü’l-hâl: Mehmed Beşe b. Mustafa, Kasım Beşe b. Hüseyin, Mehmed Beşe b. Abdullah, el-Hâc Yusuf b. Osman.>>