Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 195 Hüküm no: 136 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Arzuman’ın varisleri arasındaki miras davasında İsayi’nin iddiasının reddi Vilâyet-i Anadolu’da Eğin kasabasında Şirvan mahâllesinde sâkin iken bundan akdem hâlik [olan] Arzuman v. Banik v. Haçik nâm zimmînin verâseti sulbiye kebîre kızı Hariboyi nâm Nasrâniyeye ve oğlu Norsiz’in sulbî kebîr oğlu Serkiz’e ve sulbiye kebîre kızları Anna ve Sultân ve Meryem ve Varvar ve Hanazen’e münhasıra olup ba‘dehû kızı mezbûre Hariboyi dahi hâlike olup verâseti sadrî kebîr oğlu İsayi’ye ve sadriye kebîre kızı Ava nâm Nasrâniyeye münhasıra ve tashîh-i meseleleri bi-tarîkı’l-münâsahati’ş-şer‘iyye kırk iki sehmden i‘tibâr olunup sihâm-ı mezbûreden altı sehmi mezbûr Serkiz’e ve üçer sehmi mezbûrât Anna ve Sultân ve Meryem ve Varvar ve Hanazen’den her birine ve on dört sehmi mezbûr İsayi’ye ve yedi sehmi mezbûre Ava’ya isâbet ve intikāl eylediği [ şer‘an sâbit] ve zâhir oldukdan sonra mezbûr İsayi mahmiye-i İstanbul’da meclis-i şer‘de kasaba-i mezbûrede zikr olunan Şirvan mahâllesinde vâki‘ zikri âtî menzile vâzı‘ü’l-yed <> olduğu lede’ş-şer‘ sâbit olup kendi tarafından asil ve kız karındaşları mezbûrât taraflarından husûs-ı âti’l-beyana vekîl olduğu nehc-i şer‘î üzere sâbit olan işbu bâ‘isü’s-sifr mezbûr Serkiz muvâcehesinde üzerine da‘vâ ve takrîr-i kelâm edip hâlik-i mezbûr Arzuman’ın metrûkâtından [kab‘le’l]-helâk yedinde mülkü olup zikr olunan Şirvan mahâllesinde vâki‘ bir tarafdan Firuzat menzili ve bir tarafdan Mervan nâm zimmî menzili ve bir tarafdan kilise ve bir tarafdan tarîk-i âm ile mahdûd fevkānî ve tahtânî büyût-ı adîde ve eşcâr-ı müsmire ve gayr-ı müsmireli mülk bağ ve bahçeyi müştemil menzilin sihâm-ı mezbûreden bana isâbet eden hissemi müvekkilân-ı mezbûrât ile mezbûr Serkiz’den taleb eylediğimde bana edâdan imtinâ‘ eder, suâl olunup menzil-i mezbûrdan bana isâbet eden on dört sehim hissemi <> mahâllinde bana teslîm etmek üzere tenbîh olunmak matlûbumdur dedikde gıbbe’s-suâl mezbûr Serkiz cevâbında hâlik-i mezbûr Arzuman’ın metrûkâtından menzil-i mahdûd-ı mezkûra kendi ile kız karındaşları müvekkilât-ı mezbûrât vaz‘-ı yed eylediklerini ikrâr lâkin hâlik-i mezbûr Arzuman hayâtında menzil-i mahdûd-ı mezkûru şurût-ı müfsideden ârî hibe-i sahîha-i şer‘iyye ile benim ile kız karındaşlarım müvekkilât-ı mezbûrâta hibe ve teslîm ve temlîk edip biz dahi meclis-i hibede ittihâb ve kabz ve kabûl ve tesellüm etmekle bu vech üzere menzil-i mezbûr mülk-i mevhûbumuz olmağın ona binâen vaz‘-ı yed ederiz deyü müdde‘î-i mezbûru def‘le mukābele edicek gıbbe’l-istintâk ve’l-inkâr mezbûr Serkiz’den def‘-i mezkûrunu mübeyyine beyyine taleb olundukda zikr olunan Eğin kasabası ahâlîsinden olup müsâferet vechi üzere mahmiye-i mezbûrede Kuşçular Hanı’nda sâkin Bogos v. Mangasar ve Nikigos v. Marcan ve Sulu Han’da sâkin Agob v. Kirkor nâm zimmîler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka hâlik-i mezbûr Arzuman v. Banik v. Haçik hayâtında mahâlle-i mezbûrede vâki‘ yedinde mülkü ve hakkı olup bir tarafdan Firuzat menzili ve bir tarafdan Mervan nâm zimmî menzili ve bir tarafdan kilise ve bir tarafdan tarîk-i âm ile mahdûd fevkānî ve tahtânî büyût-ı adîdeyi ve eşcâr-ı müsmire ve gayr-ı müsmireli mülk bahçe ve bağı müştemil mülk menzilini işbu mezbûr Serkiz ile kız karındaşları Anna ve Sultân ve Meryem ve Varvar ve Hanazen’e bizim huzûrumuzda hibe-i sahîha-i şer‘iyye ile hibe ve temlîk ve teslîm, onlar dahi meclis-i hibede ittihâb ve kabz ve kabûl eylediler, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de-ri‘âyeti şerâiti’l-kabûl şehâdetleri makbûle olmağın mûcebiyle müdde‘î-i mezbûr bî-vech mu‘ârazadan men‘ birle mâ-vaka‘a bi’t-taleb ketb olundu. Fî 26 min-Saferi’l-hayr sene 1116 Şuhûdü’l-hâl: Ömer Efendi el-kâtib, Veli Efendi el-kādı, Emin Mehmed Efendi kâtib, Mustafa el-kâtib, el-Hâc Yusuf