Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 229 Hüküm no: 177 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin menzil ve müştemilatını Kasım Çelebi’ye satması Mahmiye-i İstanbul’da Keçeci Pîrî mahâllesinde sâkin Mustafa Çelebi b. Kasım nâm kimesne mahmiye-i mezbûrede meclis-i şer‘-i şerîf-i enverde işbu râfi‘ü’l-vesîka Kasım Çelebi b. Hüseyin nâm kimesne mahzarında ikrâr-ı ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahâlle-i mezbûrede vâki‘ bir tarafdan Demirci Ahmed Beşe mülkü ve bir tarafdan Hocaoğlu Mustafa Efendi ve bir tarafdan ( ) nâm hatun mülkü ve bir tarafdan tarîk-i âm ile mahdûd dâhiliyesinde iki bâb oda ve iki sofa ve hâriciyesinde iki bâb fevkānî oda ve bir sofa ve bir matbâh ve sagīr oda ve bir mağsel ve bi’r-i mâ ve bir mikdâr bahçe ve havluyu müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Kasım Çelebi’ye dört yüz elli guruşa bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûru merkūm Kasım Çelebi yedinden tamâmen ahz u kabz eyledim. Ba‘de’l-yevm menzil-i mahdûd-ı mezbûr merkūm Kasım Çelebi’nin mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: el-Hâc Mehmed Efendi b. Süleyman imam, İsmail Efendi imam-ı Edirnekapısı, el-Hâc Mustafa b. Ömer el-müezzin, İbrahim Halîfe b. Mustafa kayyûm, el-Hâc Hüseyin b. İbrahim, Bayram b. Hüseyin, Süleyman Ağa b. ( )